ზურაბ პატარაძემ მუსლიმ მრევლს რამაზან ბაირამი მიულოცა

2017-06-25 10:12:44, 754 ნახვა

რეგიონი

დღეს დილით აჭარის მთავრობის თავმჯდომარე ზურაბ პატარაძე მუსლიმი მრევლის ერთ-ერთი ყველაზე დიდი დღესასწაულის - რამაზან ბაირამის მისალოცად ბათუმის ორთაჯამეს ესტუმრა.

აჭარის მთავრობის პრესსამსახურის ინფორმაციით, მასთან ერთად ორთაჯამეში აჭარის უმაღლესი საბჭოს თავმჯდომარე დავით გაბაიძე, აჭარის სოფლის მეურნეობის და ჯანმრთელობის მინისტრები იმყოფებოდნენ.

ზურაბ პატარაძემ მილოცვისას ხაზი გაუსვა ქართველი მუსილმანების როლს ქართული სახელმწიფოს აღმშენებლობის საქმეში.

მისი თქმით, განსაკუთრებით ბევრი სამშობლოსათვის თავდადებული ადამიანი ახსოვს ისტორიას აჭარიდან.

მანვე აღნიშნა, რომ მუსლიმ მრევლს საქართველოს მთავრობასთან ერთად აჭარის რეგიონის მთავრობა განსაკუთრებულ მხარდაჭერასა და თანადგომას უცხადებს.

,,ჩვენს დებს, ჩვენს ძმებს, მინდა მივულოცო ბაირამის დადგომა. მინდა ვუსურვო მშვიდობა, წარმატებები, განვითარება, სიკეთე, სიყვარული, ოჯახის სიმტკიცე. ჩვენი ქვეყნის განვითარებისთვის, ჩვენი ქვეყნის სიძლიერისთვის ძალიან ბევრი სასიკეთო საქმე ერთად გვეკეთებინოს. ერთი თვის განმავლობაში არაერთი იფთარი, არაერთი შეხვედრა გავმართეთ და დღეს, ყველა ერთად ვზეიმობთ ბაირამის დადგომას",-აღნიშნა ზურაბ პატარაძემ.

ბაირამი მოძრავი დღესასწაულია და მას ისლამური სამყარო წელს 25 ივნისს აღნიშნავს. 30 დღიანი მარხვის შემდეგ ბაირამობას აღნიშნავენ ქართველი მუსლიმანები.

დღესასწაული სამი დღე გაგრძელდება, რა დროსაც მოხდება წინაპრების საფლავების მონახულება.

(NS)