შსს-ს საგზაო მოძრაობის უსაფრთხოების კვირეულის ფარგლებში, კასპში მოზარდებმა ზებრა-გადასასვლელი მოხატეს

2017-05-13 10:03:23, 2138 ნახვა

სამართალი

შსს-ს საგზაო მოძრაობის უსაფრთხოების კვირეულის ფარგლებში, კასპში, სკოლა-გიმნაზიის მოსწავლეებმა ე.წ. „ზებრა“-გადასასვლელი მოხატეს, მძღოლებს შსს-ს საგზაო მოძრაობის უსაფრთხოების კამპანიის ფარგლებში დამზადებული პრომო-მასალა გადასცეს და საგზაო მოძრაობის წესების დაცვისკენ მოუწოდეს. ღონისძიება კასპის მუნიციპალიტეტის გამგეობის მხარდაჭერით განხორციელდა.

აქციის პარალელურად, შინაგან საქმეთა სამინისტროს წარმომადგენლებმა სკოლა-გიმნაზიის მოსწავლებთან საინფორმაციო შეხვედრა გამართეს. პოლიციელებმა მოზარდებს საგზაო მოძრაობის წესები დეტალურად აუხსნეს და ავტოსაგზაო შემთხვევების პრევენციის შესახებ ისაუბრეს.

შინაგან საქმეთა სამინისტრომ საგზაო მოძრაობის უსაფრთხოების ფართომასშტაბიანი კამპანია - „შენი გულისთვის, შენი უსაფრთხოებისთვის“ 2015 წელს დაიწყო. კამპანიის მიზანია ავტოსაგზაო შემთხვევების პრევენცია და საგზაო მოძრაობის უსაფრთხოების შესახებ საზოგადოების ცნობიერების ამაღლება.

(NS)

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან