საქართველოს პარლამენტში აჭარისა და ქვემო სილეზიის დელეგაციებს შორის შეხვედრა გაიმართა

2017-05-11 15:52:09, 685 ნახვა

რეგიონი

საქართველოს პარლამენტში, დღეს, აჭარისა და ქვემო სილეზიის დელეგაციებს შორის შეხვედრა გაიმართა.

აჭარის დელეგაციას აჭარის მთავრობის თავმჯდომარე ზურაბ პატარაძე ხელმძღვანელობდა, რომელმაც ქვეყნებსა შორის ურთიერთობების და რეგიონული თანამშრომლობის მნიშვნელობაზე ისაუბრა.

ზურაბ პატარაძის თქმით, აჭარა და ქვემო სილეზია რეგიონული თანამშრომლობის წარმატებულ მაგალითს წარმოადგენს.

მისივე განცხადებით, ორმხრივი ურთიერთობები რეგიონებს შორის უკვე დაწყებულია როგორც საგანმანათლებლო და კულტურული, ისე ჯანდაცვის, ეკონომიკისა და ტურიზმის მიმართულებით და თანამშრომლობა დაიწყო ასევე ქვემო სილეზიის პარლამენტსა და აჭარის უმაღლეს საბჭოს შორის.

წარმატებულ თანამშრომლობაზე ისაუბრა ასევე სილეზიის სავოევოდოს მარშალმა ცეზარ ფშიბილსკიმ.

შეხვედრას პოლონური მხრიდან ესწრებოდნენ ასევე ქვემო სილეზიის სავოევოდოს რეგიონული პარლამენტის თავმჯდომარე პაველ ვრუბლევსკი, რეგიონული პარლამენტის (სეიმის) წევრები და პოლონეთის ელჩი საქართველოში მარიუშ მაშკიევიჩი.

დღესვე, ბაგრატოვანთა დარბაზში გამართული შეხვედრის შემდეგ, აჭარის ავტონომიური რესპუბლიკის უმაღლეს საბჭოსა და ქვემო სილეზიის საბჭოს (სეიმი) შორის ურთიერთანამშრომლობის შესახებ მემორანდუმი გაფორმდა.

მემორანდუმს ხელი აჭარის უმაღლეს საბჭოს თავმჯდომარემ დავით გაბაიძემ და ქვემო სილეზიის სავოევოდოს რეგიონული პარლამენტის თავმჯდომარემ პაველ ვრუბლევსკიმ მოაწერა.

ასევე, ხელი მოეწერა ქობულეთის მუნიციპალიტეტსა და მილიჩის გმინას (პოლონეთის რესპუბლიკა) შორის თანამშრომლობის შესახებ შეთანხმებას.

დღეს, საღამოს, პოლონეთის დელეგაციის წევრები რუსთაველის თეატრში გამართულ- პოეტ ზურაბ გორგილაძის 80 წლის იუბილისადმი მიძღვნილ ღონისძიებას დაესწრებიან.

ვიზიტის ფარგლებში პოლონეთის დელეგაცია 11 მაისს, რუსთაველის თეატრში გამართულ- პოეტ ზურაბ გორგილაძის 80 წლის იუბილისადმი მიძღვნილ ღონისძიებას დაესწრებიან.

12 მაისს კი საერთაშორისო გამოფენა - „Expo Batumi 2017-ის" გახსნის ცერემონიაში მიიღებენ მონაწილეობას. 12 მაისს, ბათუმში დაგეგმილია საქართველო-პოლონეთის ბიზნეს-ფორუმი სახელწოდებით - "ვროცლავი-ბათუმი", ასევე აჭარისა და ქვემო სილეზიის თანაშრომლობის კომისიის სამუშაო შეხვედრა.

ქვემო სილეზიის დელეგაცია აჭარიდან 15 მაისს გაემგზავრება.

რეგიონებს შორის ორმხრივი თანამშრომლობის ფარგლებში გამართულ შეხვედრას საქართველოს პარლამენტის თავმჯდომარის მოადგილე გიორგი ვოლსკი დაესწრო.

(NS)