იზორია პოლიციელის მკვლელობის საქმეზე: ვერ ვიტყვი, რომ გაჭიანურებას აქვს ადგილი, ასეთი სპეციფიკის დანაშაული დროს ითხოვს

2015-04-07 16:21:56, 706 ნახვა

სამართალი

შინაგან საქმეთა მინისტრის მოადგილის ლევან იზორიას განცხადებით, ამ ეტაპზე იმის თქმა, რომ პოლიციელის მკვლელობაში ეჭვმიტანილის დაკავება ჭიანურდება, არასწორია. როგორც იზორიამ განმარტა, მსგავსი სპეციფიკის დანაშაული სერიოზულ დაგეგმვასა და დროს მოითხოვს. ლევან იზორიას ინფორმაციით, პოლიციელის მკვლელობაში ეჭვმიტანილის დასაკავებლად ინტენსიური მუშაობა მიმდინარეობს.
"მე ვერ ვიტყვი, რომ გაჭიანურებას აქვს ადგილი, ასეთი სპეციფიკის დანაშაულთან როცა გავქვს საქმე, ის ითხოვს დროს, სერიოზულ დაგეგმვას და ბუნებრივია ინტენსიურად მიმდინარეობს მუშაობა ამ პიროვნების გამოვლენის მიზნით",-განაცხადა ლევან იზორიამ.
შეგახსენებთ, შსს-ს ისანი-სამგორის სამმართველოს მე-8 განყოფილების უბნის ინსპექტორ-გამომძიებელი ბექა მარგიშვილი და დეტექტივის თანაშემწე - გამომძიებელი ვალერიან გრძელიშვილი 4 აპრილს, საღამოს საათებში, თბილისში, ვარკეთილის მეტროსთან, ჯავახეთის ქუჩაზე, სამსახურებრივ მოვალეობას ასრულებდნენ, რა დროსაც მათ გადამოწმების მიზნით შალვა აბულაძე შეაჩერეს. შალვა აბულაძემ მოულოდნელად პოლიციელების მისამართით ცეცხლსასროლი იარაღიდან ცეცხლი გახსნა და შემთხვევის ადგილიდან მიიმალა. სროლის შედეგად ორივე სამართალდამცველი დაიჭრა. მიყენებული ჭრილობების შედეგად ბექა მარგიშვილი საუნივერსიტეტო კლინიკაში გადაყვანის შემდეგ გარდაიცვალა. ვალერიან გრძელიშვილს სამედიცინო დახმარება პირველ კლინიკურ საავადმყოფოში უტარდება. მიმდინარეობს ოპერატიულ-სამძებრო და საგამოძიებო ღონისძიებები შალვა აბულაძის დაკავების მიზნით. გამოძიებას ქალაქ თბილისის პროკურატურა აწარმოებს.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან