ამერიკელი და ევროპელი ჩინოვნიკები შეეგუვნენ იმ ფაქტს, რომ უკრაინაში ომი სულ მცირე მომავალ წლამდე გაგრძელდება, რადგან კრემლთან მოლაპარაკებების განახლების მცდელობებმა შედეგი ვერ გამოიღო, იუწყება Bloomberg სიტუაციის შესახებ ინფორმირებული წყაროების მოტივით.

მათი თქმით, აშშ-ის სპეციალური წარმომადგენლების, ჯარედ კუშნერის და სტივენ ვიტკოფის ვიზიტმა მოსკოვში და შემდეგ კიევში მნიშვნელოვანი პროგრესი ვერ გამოიღო. ევროპელმა ჩინოვნიკებმა Bloomberg-ს განუცხადეს, რომ ვლადიმერ პუტინი, რომელიც მათთან კრემლში სამი საათის განმავლობაში საუბრობდა, ზამთრის მოახლოებასთან ერთად უკრაინაზე თავდასხმების გაძლიერებას აპირებს.

Bloomberg-ის წყაროების ცნობით, პუტინმა არ გამოხატა სურვილი, შეარბილოს თავისი პოზიცია, მიუხედავად აშშ-ს მხრიდან მიღებული სიგნალებისა, რომ ჩიხში მყოფ სამშვიდობო მოლაპარაკებებში დასაბრუნებლად ახალი იდეებია საჭირო.

ერთ-ერთი წყაროს ცნობით, რუსეთი უახლოეს ექვს თვეში გეგმავს უკრაინის ენერგოსისტემასა და გათბობის სისტემაზე დარტყმას, რათა მშვიდობიანი მოსახლეობის ცხოვრება აუტანელი გახდეს, ასევე ევროპაში ჰიბრიდული თავდასხმების გაძლიერებას კიევის მხარდაჭერის შესასუსტებლად.

წყაროს ცნობით, პუტინი ფსონს დებს, რომ მომავალ გაზაფხულზე უფრო ძლიერ პოზიციაში იქნება და შეძლებს რუსეთის ეკონომიკის კოლაფსისგან დაცვას, რომელიც მზარდი სირთულეების წინაშე დგას. სააგენტოს წყარო დარწმუნებულია, რომ მანამდე სერიოზული მოლაპარაკებები არ გაიმართება.

Bloomberg-ის კიდევ ერთმა წყარომ განუცხადა, რომ პუტინმა ვიტკოფისა და კუშნერის ვიზიტი გამოიყენა, რათა სახელმწიფო დუმის არჩევნების წინ შიდა აუდიტორიისთვის თავისი ძალა ეჩვენებინა. ვიტკოფისა და კრემლის მიერ გამოცხადებული სამმხრივი რუსეთ-უკრაინის მოლაპარაკებები აშშ-ს მონაწილეობით შესაძლოა რუსეთში სექტემბრის არჩევნების შემდეგ გაიმართოს, თუმცა, წყაროების თქმით, ნაკლებად სავარაუდოა, რომ ისინი სამშვიდობო შეთანხმებას მიუახლოვდნენ.

ამ ვითარებაში, ევროპას მოუწევს რესურსების მოძიება უკრაინაში დამატებითი საჰაერო თავდაცვის სისტემების გასაგზავნად, ხაზს უსვამენ სააგენტოს წყაროები. სამშაბათს, დიდმა ბრიტანეთმა კიევისთვის დამატებითი 100 მილიონი ფუნტის დახმარების პაკეტი გამოაცხადა.

გერმანიის თავდაცვის მინისტრმა ბორის პისტორიუსმა განაცხადა, რომ ქვეყანა სასწრაფოდ გადასცემს Patriot-ის რაკეტებს საკუთარი მარაგებიდან უკრაინაში. „უკრაინის ზამთრისთვის მომზადება მთავარი პრიორიტეტია და ჩვენგან გადამწყვეტ და დაუყოვნებლივ მოქმედებას მოითხოვს“, - თქვა მან.

ავტორი: მარიამ იმერლიშვილი, ექსპრესნიუსის რეპორტიორი 2020 წლიდან

სოციალური ქსელები

ივანიშვილის მთავრობამ საპატრიარქოს 806 კვ/მ მიწა 1 ლარად გადასცა

განათლების შესაძლებლობა მოსწავლეებისთვის: დარეგისტრირდით BOG-ის და კომაროვის STEM სკოლაში

აბიტურიენტებს მეორადი ჩარიცხვის პროცესში მონაწილეობა 14 სექტემბრიდან ექნებათ

პაპუაშვილი - საქართველოს მიმართ ბრიუსელის პოლიტიკა ჩიხშია შესული,- დროა, ბრიუსელმა უარი თქვას დამარცხებული რევოლუციური სცენარის მომსახურებაზე