ევროკავშირმა შესაძლოა შეცვალოს რუსეთის წინააღმდეგ სანქციების მექანიზმი და უარი თქვას შეზღუდვების დიდ პაკეტებზე შეთანხმების პრაქტიკაზე. ამის ნაცვლად, ბრიუსელი განიხილავს ინდივიდუალური სანქციების ან თემატური ბლოკების დამტკიცებაზე გადასვლას, იუწყება Financial Times ევროპელ ოფიციალურ პირებზე დაყრდნობით. გაზეთის ცნობით, ამ იდეას მხარს უჭერენ როგორც ევროკომისია, ასევე ევროკავშირის ის სახელმწიფოები, რომლებიც რუსეთის მიმართ ყველაზე მკაცრ პოზიციას იკავებენ. „ეს შეიძლებოდა ყოფილიყო სანქციების ბოლო პაკეტი. ახლა სრულიად ნათელია, რომ ეს მიდგომა აღარ მუშაობს“, - განუცხადა ერთ-ერთმა წყარომ Financial Times-ს 21-ე პაკეტზე შეთანხმების პროცესის კომენტირებისას.

ამჟამინდელი სისტემა, რომლის მიხედვითაც სანქციები გაერთიანებულია დიდ პაკეტებად და მოითხოვს ევროკავშირის 27-ვე ქვეყნის ერთსულოვან მხარდაჭერას, სულ უფრო მეტად იწვევს გაჭიანურებულ მოლაპარაკებებს. ცალკეული სახელმწიფოები ვეტოს უფლებას იყენებენ საკუთარი ეკონომიკური ინტერესების დასაცავად. სამმა ევროპელმა ოფიციალურმა პირმა გაზეთს განუცხადა, რომ ევროკომისია უკვე მუშაობს მექანიზმზე, რომელიც შეამცირებს წევრი სახელმწიფოების მიერ მოლაპარაკებების დროს ვეტოს უფლების გამოყენების შესაძლებლობას.

21-ე სანქციების პაკეტზე მოლაპარაკებებმა გამოიწვია ამ მიდგომის გადახედვა. ევროკომისიამ პროექტი 9 ივნისს წარადგინა, თუმცა 13 და 15 ივლისის შეხვედრებზე ევროკავშირის ქვეყნებმა დოკუმენტზე შეთანხმებას ვერ მიაღწიეს. საბერძნეთი, საფრანგეთი, იტალია, გერმანია, ავსტრია, პორტუგალია და ბულგარეთი გარკვეულ დებულებებს ეწინააღმდეგებოდნენ. საბერძნეთმა რამდენიმე კვირის განმავლობაში დაბლოკა მისი მიღება და მოახერხა რუსული თხევადი ბუნებრივი აირის (LNG) ტრანსპორტირებისას Dynagas-ის გემებზე შეზღუდვების მოხსნა. ევროპული გემებით რუსული LNG-ის ტრანსპორტირება ერთი წლით იყო ნებადართული, შემდგომი გადახედვის პირობით. შედეგად, მხოლოდ გასული კვირის ბოლოს დაამტკიცა ევროკავშირის საბჭომ 21-ე სანქციების პაკეტი.

კრემლმა ადრე არაერთხელ განაცხადა, რომ სანქციებს უკანონოდ მიიჩნევს. რუსეთის პრეზიდენტის პრესმდივანმა დიმიტრი პესკოვმა განაცხადა, რომ სანქციების პოლიტიკა, პირველ რიგში, ევროპულ სახელმწიფოებს აზიანებს. „არა მგონია, სანქციების ლიმიტის მიღწევაზე ვისაუბროთ. ის არ არსებობს“, - განაცხადა კრემლის პრესსპიკერმა.

ავტორი: ცოტნე ტალახაძე, ექსპრესნიუსის რეპორტიორი 2019 წლიდან

სოციალური ქსელები

მაკრონმა აღიარა, რომ მომავალში საფრანგეთის პრეზიდენტად დაბრუნებას გეგმავს

უკრაინამ დონბასში რუსული არმიის წინააღმდეგ საბრძოლო რობოტები პირველად გამოიყენა

კობახიძე – მაინც ყოველდღიურად იკრიბებიან ხან 20, ხან 50, ხან 150 კაცით, სექტის სახე ნამდვილად შეიძინა ამ დაჯგუფებამ

ივანიშვილის პაპუაშვილი ოპოზიციურად განწყობილ ხალხს სექტას უწოდებს