პენტაგონი კუბის წინააღმდეგ სამხედრო ოპერაციის ვარიანტებს იკვლევს, მათ შორის კუნძულზე 101-ე საჰაერო-სადესანტო დივიზიის „ათასობით“ ჯარისკაცის განლაგებას, განუცხადა CBS News-ს რამდენიმე ამერიკელმა ოფიციალურმა პირმა. მათი თქმით, ასეთი გეგმები ბოლო კვირების განმავლობაში განიხილებოდა, მაგრამ საბოლოო გადაწყვეტილება მიღებული არ არის.

საომარი მოქმედებების მდივანმა პიტ ჰეგსეთმა ადრე მიანიშნა კუბის წინააღმდეგ სამხედრო სცენარის შესაძლებლობაზე. ივნისში მან განაცხადა, რომ კუბის მცდელობა, შეიძინოს იარაღი, რომელიც საფრთხეს უქმნის აშშ-ს, დაპირისპირების საბაბი იქნებოდა. დაზვერვის ცნობების თანახმად, კუბამ 300-ზე მეტი დრონი შეიძინა გუანტანამოს ყურის ბაზის, აშშ-ის სამხედრო გემების და ფლორიდის შტატის წინააღმდეგ თავდასხმებისთვის.

თუმცა, წყაროების ცნობით, კუბის წინააღმდეგ ოპერაცია უახლოეს მომავალში ნაკლებად სავარაუდოა ირანთან განახლებული ომის გამო, რომელიც პენტაგონის მნიშვნელოვან რესურსებს მოიხმარს. ამასობაში, აშშ-ის პრეზიდენტ დონალდ ტრამპის ადმინისტრაცია ცდილობს კუნძულზე მთავრობის შეცვლას ეკონომიკური და დიპლომატიური ზეწოლის გზით.

სახელმწიფო მდივანმა მარკო რუბიომ განაცხადა, რომ ვაშინგტონს სურს კუბაში ტექნოკრატიული მთავრობის ნახვა, რომელიც მზად იქნება რეფორმების განსახორციელებლად. თუმცა, 11 ივლისს მან განაცხადა, რომ კუბის რეჟიმი და მისი „კორუმპირებული ელიტა“ კვლავაც არსებობს, იცავს „მორალურად გაკოტრებულ მარქსისტულ იდეოლოგიას“ და ინარჩუნებს „სრული კონტროლის“ ქვეყანაზე.

მაისში, ცენტრალური სადაზვერვო სააგენტოს დირექტორი ჯონ რეტკლიფი ჰავანას ესტუმრა. მან განაცხადა აშშ-ს მზადყოფნა, გააფართოვოს თანამშრომლობა ფუნდამენტური რეფორმების პირობით და ამავდროულად, კუბის ხელისუფლებას შეახსენა აშშ-ს მიერ ვენესუელის მმართველის, ნიკოლას მადუროს დაკავება, სადაც ამ ოპერაციის ერთ-ერთი მონაწილე გამოჩნდა.

ტრამპის თეთრ სახლში დაბრუნების შემდეგ, აშშ-მ მკვეთრად გაზარდა ზეწოლა კუბაზე და ის ტერორიზმის სპონსორების სიაში დაამატა. 2026 წლის იანვარში, აშშ-ს პრეზიდენტმა საგანგებო მდგომარეობა გამოაცხადა, კუბიდან ეროვნული უსაფრთხოების საფრთხის მოტივით, და კუნძულზე ენერგეტიკული ბლოკადა დააწესა. მაისში ქვეყნის ხელისუფლებამ ქვეყნის ელექტროქსელის კრიტიკული მდგომარეობის შესახებ განაცხადა.

ტრამპმა არაერთხელ ისაუბრა კუბის რეჟიმის მოსალოდნელ კოლაფსზე და პირობა დადო, რომ ამ საკითხს ირანთან „მოგვარების“ შემდეგ მოაგვარებდა. „The Wall Street Journal“-ის ცნობით, აშშ რესპუბლიკაში მთავრობის შეცვლას 2026 წლის ბოლომდე ელის.

კუბის პრეზიდენტმა მიგელ დიას-კანელმა განაცხადა, რომ ქვეყანა მზადაა, წინააღმდეგობა გაუწიოს ამერიკულ შემოჭრას. „ჩვენ ვიბრძოლებთ, დავიცავთ თავს და თუ ბრძოლაში დაცემის განწირულები ვართ, მაშინ სამშობლოსთვის სიკვდილი სიცოცხლეს ნიშნავს“, - თქვა მან.

ავტორი: ცოტნე ტალახაძე, ექსპრესნიუსის რეპორტიორი 2019 წლიდან

სოციალური ქსელები

აშშ-ის ფინანსთა მინისტრი: თურქეთმა, ომანმა და არაბთა გაერთიანებულმა საემიროებმა ირანული ავიახაზებისა და ბანკების ფუნქციონირება შეზღუდეს

ყაზახეთის პრეზიდენტმა თავდაცვის მინისტრი თანამდებობიდან გაათავისუფლა მას შემდეგ, რაც სამხედრო წვრთნების დროს 14 ჯარისკაცი დაიღუპა

კახა კალაძე: მჯერა, ჩვენი გმირების ბრძოლას უკვალოდ არ ჩაუვლია, ოკუპაცია დროებითია, სამშობლო კი მარადიული

გვარამია - პატივი მივაგოთ ჩვენს გმირებს და ხმამაღლა ვუთხრათ სამყაროს: სოხუმი საქართველოა! საქართველო ჩვენია! რუსეთი მტერია!