რუსეთის საგარეო საქმეთა მინისტრმა სერგეი ლავროვმა განაცხადა, რომ მოსკოვი გააგრძელებს ომს უკრაინის წინააღმდეგ მანამ, სანამ ვლადიმერ პუტინის მიერ 2024 წლის ივნისში დასახული მიზნები არ იქნება მიღწეული - იმ დროს პუტინი არსებითად კიევის სრულ კაპიტულაციაზე საუბრობდა. „პრეზიდენტმა ნათლად დაადასტურა, რომ ჩვენ გავაგრძელებთ 2024 წლის ივნისში ვლადიმერ პუტინის საგარეო საქმეთა სამინისტროში გამოსვლისას დასახული მიზნების მიღწევას“, - ხაზი გაუსვა ლავროვმა მოზამბიკის საგარეო საქმეთა მინისტრ მარია ლუკასთან ერთობლივ პრესკონფერენციაზე (ვიდეო გამოაქვეყნა რუსეთის საგარეო საქმეთა სამინისტრომ).

ლავროვის მიერ ხსენებულ 2024 წლის გამოსვლაში პუტინმა მოითხოვა უკრაინული ჯარების გაყვანა დონეცკის, ლუგანსკის, ზაპოროჟიეს და ხერსონის რეგიონების მთელი ტერიტორიიდან, რომლებიც რუსეთმა ვერ დაიპყრო, ამ რეგიონების და ყირიმის რუსეთის ტერიტორიებად აღიარება, უკრაინის უარი ნატოში გაწევრიანებაზე და უკრაინის „დემილიტარიზაცია“ და „დენაციფიკაცია“. პუტინმა განაცხადა, რომ როგორც კი ეს პირობები დაკმაყოფილდება, ის „დაუყოვნებლივ“ გასცემს ცეცხლის შეწყვეტის ბრძანებას.

ლავროვმა ასევე დაადანაშაულა დასავლეთის ქვეყნები „მოლაპარაკების სურვილის იმიტაციაში“ რუსეთისთვის პირდაპირი ულტიმატუმების წაყენებით. მან განაცხადა, რომ ყველა ადრე მიღწეული შეთანხმება - 2014, 2015, 2019 და 2022 წლებშიც კი - თავად დასავლეთმა გაანადგურა და შედეგად, მოსკოვის „კეთილი ნებისა და იმედის რეზერვი“ „სრულიად ამოწურულია“. მინისტრმა ხაზგასმით აღნიშნა, რომ რუსეთი აღარ ენდობა დასავლურ გარანტიებს.

2024 წლის ივნისში პუტინმა, უკრაინის კაპიტულაციასთან ერთად, ასევე მოითხოვა რუსეთის წინააღმდეგ დასავლური სანქციების მოხსნა და დაემუქრა, რომ თუ კიევი და დასავლეთი უარყოფენ ამ პირობებს, „რეალობა ადგილზე შეიცვლება და მოლაპარაკებების პირობები განსხვავებული იქნება“.

ავტორი: ექსპრესნიუსი,

სოციალური ქსელები

აშშ-ის ფინანსთა მინისტრი: თურქეთმა, ომანმა და არაბთა გაერთიანებულმა საემიროებმა ირანული ავიახაზებისა და ბანკების ფუნქციონირება შეზღუდეს

ყაზახეთის პრეზიდენტმა თავდაცვის მინისტრი თანამდებობიდან გაათავისუფლა მას შემდეგ, რაც სამხედრო წვრთნების დროს 14 ჯარისკაცი დაიღუპა

კახა კალაძე: მჯერა, ჩვენი გმირების ბრძოლას უკვალოდ არ ჩაუვლია, ოკუპაცია დროებითია, სამშობლო კი მარადიული

გვარამია - პატივი მივაგოთ ჩვენს გმირებს და ხმამაღლა ვუთხრათ სამყაროს: სოხუმი საქართველოა! საქართველო ჩვენია! რუსეთი მტერია!