აშშ-მ და ირანმა შეთანხმდნენ, რომ შეწყვიტონ ერთმანეთზე თავდასხმები და დოჰაში შეხვდნენ ერთმანეთს, რათა მოაგვარონ ჰორმუზის სრუტესთან დაკავშირებული დავა, განუცხადა Axios-ს აშშ-ის მაღალჩინოსანმა. მისი თქმით, თავდაპირველად მხარეები 30 ივნისს შვეიცარიაში შეხვედრას გეგმავდნენ ირანის ბირთვული პროგრამის განხილვის დასაწყებად, მაგრამ კონფლიქტის ესკალაციის გამო, შეხვედრის ადგილი შეიცვალა და დღის წესრიგი სრუტის გარშემო არსებულ ვითარებაზე გადავიდა.

ამავდროულად, Reuters-ის ცნობით, ვაშინგტონი და თეირანი გააგრძელებენ ტექნიკურ მოლაპარაკებებს ურთიერთგაგების მემორანდუმის ყველა პუნქტზე. „ორივე მხარე ამ ეტაპზე თავს შეიკავებს აქტიური ქმედებებისგან და გემებს შეეძლებათ თავისუფლად გადაადგილდნენ [ჰორმუზის სრუტეში]“, - განუცხადა სააგენტოს აშშ-ის მაღალჩინოსანმა. აშშ-მ და ირანმა ცეცხლი 26 ივნისს განაახლეს, მიუხედავად ომის დასრულების შესახებ ხელმოწერილი მემორანდუმისა. ამერიკულმა ძალებმა ირანის ტერიტორიას თავს დაესხნენ მას შემდეგ, რაც ირანის ძალებმა ჰორმუზის სრუტეში ტანკერი დაარტყეს. საპასუხოდ, ისლამური რევოლუციის გუშაგთა კორპუსმა (IRGC) რაკეტები და დრონები გამოიყენა ქუვეითსა და ბაჰრეინში ამერიკული ბაზების წინააღმდეგ. ამ ფონზე, ირანელმა ოფიციალურმა პირმა გამოაცხადა შეერთებულ შტატებთან კვირას, 28 ივნისს დაგეგმილი ტექნიკური მოლაპარაკებების გაუქმების შესახებ.

აშშ-ის პრეზიდენტმა დონალდ ტრამპმა თეირანი ცეცხლის შეწყვეტის დარღვევაში დაადანაშაულა და დაემუქრა, რომ ქვეყანამ „შესაძლოა არსებობა შეწყვიტოს“, თუ ამერიკული ძალები სრულმასშტაბიან საომარ მოქმედებებს განაახლებენ. „როგორც ჩანს, ისინი ვერასდროს ისწავლიან! შეიძლება დადგეს წერტილი, როდესაც ჩვენ აღარ შევძლებთ თავშეკავების გამოვლენას და იძულებულნი ვიქნებით სამხედრო გზით დავასრულოთ ის, რაც დავიწყეთ და ძალიან წარმატებით. თუ ეს მოხდება, ირანის ისლამური რესპუბლიკა არსებობას შეწყვეტს!“ - დაწერა ტრამპმა სოციალურ მედია პლატფორმა TruthSocial-ზე.

18 ივნისს შეერთებულმა შტატებმა და ირანმა ხელი მოაწერეს ურთიერთგაგების მემორანდუმს, რომელიც 60-დღიანი ცეცხლის შეწყვეტის და ომის დასრულების მოლაპარაკებების დაწყებისკენ მოუწოდებს. 21 ივნისს მხარეებმა პირველი ტექნიკური კონსულტაციები გამართეს კატარისა და პაკისტანის შუამავლობით გრძელვადიანი სამშვიდობო შეთანხმების მისაღწევად.

ავტორი: ექსპრესნიუსი,

სოციალური ქსელები

ბილ გეითსი: ხელოვნური ინტელექტის წესებზე შეთანხმება ბირთვული იარაღის შეზღუდვაზე უფრო რთული იქნება

ელენე ხოშტარია - ვივამედის კლინიკიდან ვბრუნდები რუსთავის ციხეში - მკურნალობის პირველი ეტაპი დასრულებულია

პენიტენციური სამსახური უარყოფს რეჟიმის პატიმარ არჩილ მუსელიანცის ბრალდებებს

ევროკავშირის წარმომადგენლობა - ევროკავშირი მტკიცედ უჭერს მხარს საქართველოს დამოუკიდებლობას, სუვერენიტეტსა და ტერიტორიულ მთლიანობას