თბილისის შემოვლითი მაგისტრალის მესამე ლოტის - ავჭალა-აეროპორტის 22.5-კილომეტრიანი მონაკვეთის მშენებლობასთან დაკავშირებით თებერვალში გამოცხადებული ტენდერი დასრულდა. საერთაშორისო ტენდერის სავარაუდო ღირებულება 932 მილიონ ლარს შეადგენდა და მასში მონაწილეობა სულ რვა კომპანიამ მიიღო.

წარდგენილი წინადადებების თანახმად, მთავრობამ გზის ამ მონაკვეთზე მნიშვნელოვან ფასდაკლებას მიაღწია, რადგან ტენდერში დაფიქსირებული მაქსიმალური ფასი 684 მილიონი ლარი იყო (ფასდაკლება სატენდერო ფასთან 247.6 მლნ ლარი), ხოლო ყველაზე დაბალი ფასის წინადადება 471 მილიონ ლარს შეადგენდა, რაც ₾461 მილიონიან ფასდაკლებას წარმოადგენს.

ტენდერში მონაწილეობა სულ რვა კომპანიამ მიიღო, მათ შორის ორი ქართული და ექვსი ჩინური კომპანიაა, წარდგენილი შეთავაზებები ასე ნაწილდება:

• ანაგი — 684,402,139 ლარი;
• Hunan Road & Bridge Construction Group Company Ltd. — 569,719,547 ლარი;
• China Railway Tunnel Group Co., LTD. — 553,110,952 ლარი;
• Guizhou Highway Engineering Group Co., Ltd. — 543,883,409 ლარი;
• შპს კომპანია ბლექ სი გრუპი — 531,731,821 ლარი;
• SINOHYDRO BUREAU 16 & SINOHYDRO BUREAU 14 — 506,403,259 ლარი;
• Xinjiang Beixin Road & Bridge Group Co., Ltd. — 483,320,107 ლარი;
• Longjian Road and Bridge Co., Ltd. — 471,227,787 ლარი.

შესაბამისად, ყველაზე დაბალი ფასი ჩინურმა კომპანია Longjian Road and Bridge Co-მ წარადგინა. აღნიშნულ კომპანიას ჯერჯერობით საქართველოში ინფრასტრუქტურული პროექტების განხორციელების გამოცდილება არ აქვს. ასევე არ აქვს განხორციელებული საქართველოში პროექტები კომპანია Xinjiang Beixin Road & Bridge Group Co-ს, ხოლო ტენდერის სხვა ყველა მონაწილეს კი ქვეყანაში მსხვილი ინფრასტრუქტურული პროექტების განხორციელების გამოცდილება აქვს.

თბილისის შემოვლითი მაგისტრალის 22.5-კილომეტრიანი მონაკვეთი:

ტენდერი 2026 წლის თებერვალში გამოცხადდა და ის თავდაპირველი გეგმით 15 აპრილს უნდა დასრულებულიყო, თუმცა ის ჯერ 8 მაისამდე, საბოლოოდ კი პირველ ივნისამდე გადავადდა.

გამოცხადებული ტენდერი ორი ძირითადი სეგმენტის მშენებლობას გულისხმობს:

• ავჭალა–გლდანის 5.8-კილომეტრიანი მონაკვეთი;
• გლდანი–აეროპორტის 16.7-კილომეტრიანი მონაკვეთი.

გეგმის მიხედვით, მაგისტრალი იქნება 4-ზოლიანი და რთულ საინჟინრო ნაგებობებს მოიცავს: 16 ხიდს, 4 პარალელურ გვირაბსა და 4 სატრანსპორტო კვანძს. გზა სათავეს ავჭალის სარკინიგზო ხიდთან იღებს, მიემართება სამხრეთ-აღმოსავლეთით და დიდი ლილოს შესასვლელთან, ლილოს ბაზრობამდე სრულდება.

უკვე დასრულებულია გზის მეორე ლოტის - წიწამური-ავჭალის 7.3-კილომეტრიანი მონაკვეთის სამშენებლო ტენდერი, რომელშიც წინადადება ათმა კომპანიამ წარადგინა. იმის მიუხედავად რომ ტენდერის სავარაუდო ღირებულება 490 მილიონ ლარს შეადგენდა, მასში მონაწილე არცერთ კომპანიას 490 მილიონზე დაბალი თანხა არ წარუდგენია და მიღებული შეთავაზებები 520 მილიონი ლარიდან 952 მილიონ ლარამდე მერყეობს. ამჟამად სამინისტრო აღნიშნული წინადადებების შეფასების პროცესშია.

ავტორი: ექსპრესნიუსი,

სოციალური ქსელები

პუტინს აცნობეს ბენზინის წარმოების სწრაფად გაზრდის შეუძლებლობის შესახებ

რუბიო: აშშ ირანისა და ლიბანის მოლაპარაკებებს ერთმანეთისგან მიჯნავს, თუმცა „ირანის ფაქტორს“ აღიარებს

ხოშტარიას მკურნალობაში მისი მკურნალი რევმატოლოგი ჩაერთვება და გასინჯავს

პუტინი გაგლოევს: ოსებს შეუძლიათ იამაყონ თავიანთი წინაპრებით