აშშ-ის პრეზიდენტმა დონალდ ტრამპმა კიდევ ერთხელ გაიმეორა, რომ მოსკოვი სამშვიდობო შეთანხმების მიღწევას ცდილობს, ხოლო უკრაინას ომის დასრულების შანსის შესანარჩუნებლად „მოქმედება“ სჭირდება.

„რუსეთს შეთანხმება სურს და [უკრაინის პრეზიდენტი ვოლოდიმირ] ზელენსკი ვალდებულია იმოქმედოს. წინააღმდეგ შემთხვევაში, ის დიდ შესაძლებლობას ხელიდან გაუშვებს და მოქმედება მოუწევს“, - განუცხადა ტრამპმა პარასკევს ჟურნალისტებს, როდესაც უპასუხა კითხვას, კვლავ მოითხოვს თუ არა ვაშინგტონი ზელენსკისგან საპრეზიდენტო არჩევნების ზაფხულამდე ჩატარებას.

მანამდე, უკრაინელმა და დასავლელმა ოფიციალურმა პირებმა Financial Times-ს (FT) განუცხადეს, რომ კიევი ემზადება საპრეზიდენტო არჩევნების და რუსეთთან სამშვიდობო შეთანხმების შესახებ რეფერენდუმის ჩასატარებლად უკვე 2026 წლის გაზაფხულზე. მათი თქმით, ზელენსკიმ ამის შესახებ ოფიციალურად 24 თებერვალს - რუსული აგრესიის დაწყებიდან მეოთხე წლისთავზე - გამოაცხადა.

FT-ის წყაროების ცნობით, მანამდე ტრამპის ადმინისტრაციამ მოითხოვა, რომ უკრაინამ ორივე არჩევნები 15 მაისამდე ჩაატაროს და რუსეთთან სამშვიდობო მოლაპარაკებები ზაფხულისთვის დაასრულოს.

მოგვიანებით, თავად ზელენსკიმ უარყო გაზეთის ინფორმაცია. „მე არაერთხელ მისაუბრია არჩევნებზე. ჩვენ ვატარებთ არჩევნებს, როდესაც ყველა საჭირო უსაფრთხოების გარანტია არსებობს“, - განუცხადა პრეზიდენტმა ჟურნალისტებს. მან თქვა, რომ არჩევნების საკითხს ხშირად უკრაინის მოკავშირეები აყენებენ და არა თავად კიევი. ზელენსკიმ ხაზგასმით აღნიშნა, რომ უსაფრთხოება კვლავ რჩება არჩევნების ჩატარების მთავარ პირობად.

ადრე კრემლის პრესსპიკერმა დიმიტრი პესკოვმა განაცხადა, რომ უკრაინაში სამშვიდობო მოლაპარაკებების შემდეგი რაუნდი 17-18 თებერვალს ჟენევაში გაიმართება. რუსეთის შეიარაღებული ძალების გენერალური შტაბის უფროსის, ადმირალ იგორ კოსტიუკოვის ნაცვლად, რომელიც აბუ დაბიში რუს მომლაპარაკებლებს ხელმძღვანელობდა, დელეგაციას ამჯერად კვლავ ვლადიმერ მედინსკი უხელმძღვანელებს, პრეზიდენტის თანაშემწე, რომელიც „მკაცრი ხაზის“ მომხრედ ითვლება.

ავტორი: ექსპრესნიუსი,

სოციალური ქსელები

ივანიშვილის წარმომადგენელი იონათამიშვილი აფხაზეთში ბენზინის მიწოდებაზე კითხვების გამო ოპოზიციის აკრძალვას ითხოვს

სარჯველაძემ გომის მთაზე ავტოსაგზაო შემთხვევის შედეგად დაზარალებულები მოინახულა

გომის მთაზე მომხდარი ავარიის შედეგად დაშავებული 11 პაციენტიდან 6 ბავშვია, ისინი ბათუმის რესპუბლიკურ საავადმყოფოში არიან

პუტინის რეჟიმმა კენედების დინასტიის წევრი, მოქმედი ჯანდაცვის მინისტრის შვილი, ძებნაში გამოაცხადეს და პატიმრობა შეუფარდეს