რუსეთმა ვერ შეძლო დასავლური ტექნოლოგიებისგან თავის დაღწევა, მიუხედავად ვლადიმერ პუტინის მოწოდებებისა და (მისი) მტკიცებისა, რომ ეს უკვე მიღწეულია. ეკონომიკური განვითარების სამინისტროს მიერ შედგენილი შეფასების თანახმად  ქვეყანა კვლავ კრიტიკულად არის დამოკიდებული იმპორტზე მიმდინარე ომისთვის მნიშვნელოვან სფეროებში, მათ შორის მექანიკური ინჟინერიაში, დრონების წარმოებასა და ენერგეტიკაში. დოკუმენტი  Financial Times-მა მოიპოვა.

დოკუმენტის თანახმად, არაენერგეტიკული ექსპორტის გაფართოების მცდელობები ასევე ვერ იძლევა სასურველ შედეგებს.

დოკუმენტში აღწერილია ექვსწლიანი გეგმა, რომლის მიხედვითაც კრიტიკულ სექტორებში იმპორტის ჩანაცვლების მიზნები 2030 წლისთვის, პუტინის ამჟამინდელი საპრეზიდენტო ვადის დასასრულისთვის იქნება მიღწეული. დოკუმენტის ავტორები ამტკიცებენ, რომ ეკონომიკური ტრანსფორმაცია გარდაუვალია და პროგნოზირებენ უცხოელი მომწოდებლებისგან ტექნოლოგიურ დამოუკიდებლობაზე დაჩქარებულ გადასვლას. თუმცა, ეს დამოუკიდებლობა ათწლეულის ბოლომდე არცერთ სექტორში არ იქნება მიღწეული. მაგალითად, გემთმშენებლობაში თვითკმარობა 60%-ზე ნაკლები იქნება, ხოლო ავიაციაში - დაახლოებით 50%. დრონებიც კი, რომლებიც ამჟამად 60%-ზე მეტად უცხოურ კომპონენტებზეა დამოკიდებული, ხუთი წლის განმავლობაში რუსეთში მხოლოდ 80%-ით იქნება წარმოებული.

და ეს გეგმებიც კი, რომლებიც 2025 წლის თებერვლის დოკუმენტშია ასახული, ექსპერტებისთვის მიუღწეველი ჩანს. „2030 წლის მიზნები პუტინისთვის უფრო ფანტაზიას ჰგავს, ვიდრე რეალისტურ გეგმას“, - განუცხადა FT-ს ალექსანდრა პროკოპენკომ, რუსეთისა და ევრაზიის კარნეგის ბელინსკის ცენტრის მკვლევარმა. „იმის გათვალისწინებით, რომ ისინი ჯერ კიდევ ასრულებდნენ თავიანთ გათვლებს გასული წლის თებერვალში, ბიუროკრატია ხვდება, რომ იმპორტის ჩანაცვლება შიდა წარმოებით ძალიან შეზღუდული ტემპით წარიმართება“.

რუსეთი ამჟამად „ტექნოლოგიური სუვერენიტეტისა“ და „ტექნოლოგიური ლიდერობისკენ“ მიიწევს და ეს უფრო სწრაფად უნდა გაკეთდეს, განაცხადა პუტინმა 2025 წლის დეკემბერში. თუმცა, მან დასძინა, „დარწმუნებით შეიძლება ითქვას... რომ რუსეთმა მიაღწია სრულ ციფრულ სუვერენიტეტს“.

პუტინმა ხაზგასმით აღნიშნა, რომ შეერთებულ შტატებთან და ჩინეთთან ერთად, ის ერთ-ერთია იმ სამი ქვეყნიდან, რომლებიც სარგებლობენ ციფრული სუვერენიტეტით. მან არ ახსნა, თუ რას გულისხმობდა ამაში. თუმცა, ექვსი კვირის შემდეგ, ილონ მასკმა, დონალდ ტრამპის მოთხოვნით და უკრაინის მიერ შედგენილი სიის შესაბამისად, დახურა Starlink-ის ტერმინალები, რომლებსაც ფრონტის ხაზზე მყოფი რუსი ჯარისკაცები იყენებდნენ შეზღუდვების გვერდის ავლისთვის. ეს „რუსეთის შეიარაღებულ ძალებში კომუნიკაციებსა და საბრძოლო კონტროლს რამდენიმე წლით უკან აბრუნებს, ახლა უკვე დავიწყებულ უძველეს ტექნოლოგიებამდე - სადენიანი ინტერნეტი, Wi-Fi და რადიოკავშირი“, - წუხდა Z-არხის „სამხედრო ინფორმატორი“:

გამოდის, რომ „ნატოსთან ბრძოლა“, ნატოს თანამგზავრულ ინტერნეტზე დაყრდნობით და საკუთარი ეკვივალენტების დროულად შემუშავების გარეშე, ცუდი იდეაა. ვის წარმოედგინა?
გასული წლის აგვისტოსთვის რუსმა მწარმოებლებმა ავიაკომპანიებისთვის იმ წელს მიწოდებისთვის დაგეგმილი 15 სამგზავრო თვითმფრინავიდან მხოლოდ ერთი მიაწოდეს. ეს იმის მიუხედავად, რომ უკრაინაში ომის დაწყებიდან მალევე დაიწყო ავიაციის ინდუსტრიის აღორძინების მასშტაბური პროგრამა, რომლის მიზანი იყო Boeing-ისა და Airbus-ის თვითმფრინავების ჩანაცვლება, რომლებიც მიუწვდომელი გახდა.

რუსეთში ავიაციის ინდუსტრიის სრულფასოვანი აღორძინებისთვის „არც კომპონენტების ბაზა არსებობს, არც ტექნოლოგია, არც ქარხნები და არც ინჟინრები“, - განუცხადა მაშინ Reuters-ს ავიაციის ინდუსტრიის წყარომ. „ამ ყველაფრის ნულიდან შექმნას წლები, თუ არა ათწლეულები დასჭირდება“.

ელექტრონიკის ინდუსტრიაში, კომპანიების 61% კვლავ უცხოური საინჟინრო პროგრამული სისტემების გამოყენებას განაგრძობს, განაცხადა ინდუსტრიისა და ვაჭრობის სამინისტროს ციფრული ტექნოლოგიების დეპარტამენტის დირექტორის მოადგილემ, ივან კუზმენკომ. ინდუსტრია 98.3%-ით არის დამოკიდებული იმპორტირებულ ჩარხებზე: 2024 წლისთვის, ადგილობრივი წარმოების აღჭურვილობა 2%-ზე ნაკლებს შეადგენდა. დიდი უმრავლესობა (71%) ჩინეთიდან მოდიოდა, ხოლო გერმანული, იაპონური და სამხრეთ კორეული აღჭურვილობის იმპორტი სანქციების გამო პრაქტიკულად ნულამდე შემცირდა.

რუსეთის მთავარ ინდუსტრიაში, ნავთობშიც კი, ვიცე-პრემიერმა ალექსანდრე ნოვაკმა პირობა დადო, რომ „იმპორტს კრიტიკული აღჭურვილობის 100%-ით ჩაანაცვლებდა“. მინერალური რესურსების ბაზის განვითარების მთავრობის სტრატეგიის თანახმად, იმპორტირებული საბურღი აღჭურვილობის, ასევე სამთო მოპოვებისთვის ანალიტიკური პროგრამული უზრუნველყოფის წილი 90%-ს აღემატება. სამთო კომპანიების მიერ გამოყენებული სამთო აღჭურვილობის 50 პროცენტი და მიწისზედა გეოფიზიკური აღჭურვილობის 30% იმპორტირებული რჩება.

ეკონომიკის სამინისტროს დოკუმენტში ასახული გეგმები „არარეალისტურია“, იმის გათვალისწინებით, რომ რუსეთი იმპორტზე დიდად არის დამოკიდებული, აცხადებს ფინეთის ბანკის განვითარებადი ეკონომიკის ინსტიტუტის უფროსი ეკონომისტი ჰელი სიმოლა:

მრავალი მიზნის მისაღწევად, მათ უკვე მოუწიათ ზოგიერთი მოთხოვნის მიტოვება, რადგან შიდა ალტერნატივები არ არსებობს. ზოგიერთ შემთხვევაში, ჩინურ საქონელს უბრალოდ რუსულის ეტიკეტირება ენიჭება მიზნების მისაღწევად.

ავტორი: ექსპრესნიუსი,

სოციალური ქსელები

აზერბაიჯანმა და ამერიკის შეერთებულმა შტატებმა სტრატეგიული პარტნიორობის ქარტიას მოაწერეს ხელი.

მაკრონი: ტრამპის ადმინისტრაცია ღიად ეწინააღმდეგება ევროპას

ცხინვალში დაკავებული საქართველოს მოქალაქე გაათავისუფლეს

სამთავრობო პროპაგანდისტული იმედის 10-10%-იანი წილი 5-მა ჟურნალისტმა 100-100 ლარად იყიდა