რუსეთმა ორჯერ სცადა ნატოში გაწევრიანება, თუმცა ორივეჯერ უარი მიიღო, განაცხადა ვლადიმერ პუტინმა ვალდაის საერთაშორისო დისკუსიის კლუბის შეხვედრაზე.

მან თქვა, რომ პირველი ინიციატივა საბჭოთა კავშირიდან 1954 წელს წამოვიდა, ხოლო მეორედ რუსეთიდან 2000 წელს, აშშ-ის პრეზიდენტ ბილ კლინტონის მოსკოვში ვიზიტის დროს. „ჩვენმა ქვეყანამ, რომელიც ბლოკური დაპირისპირების საფუძვლის აღმოფხვრას და საერთო უსაფრთხოების სივრცის შექმნას ცდილობს, ორჯერ გამოაცხადა ნატოში გაწევრიანების მზადყოფნა. პირველად 1954 წელს, საბჭოთა ეპოქაში იყო, ხოლო მეორედ აშშ-ის პრეზიდენტ კლინტონის მოსკოვში ვიზიტის დროს, როდესაც ეს საკითხი განვიხილეთ“, - თქვა პუტინმა.

ამავდროულად, სახელმწიფოს მეთაურმა კიდევ ერთხელ გაიმეორა მტკიცება, რომ უკრაინაში მის მიერ წამოწყებული ომის თავიდან აცილება შეიძლებოდა, თუ „ნატო არ მიუახლოვდებოდა რუსეთის საზღვრებს“ და თუ უკრაინა შეინარჩუნებდა თავის „რეალურ სუვერენიტეტს“. „ამის თავიდან აცილება შეიძლებოდა, თუ ბაიდენის ადმინისტრაციასთან მუშაობა სხვაგვარად იქნებოდა სტრუქტურირებული, თუ უკრაინა არ გადაიქცეოდა დესტრუქციულ ინსტრუმენტად სხვების ხელში, თუ ამ მიზნით არ იქნებოდა გამოყენებული ჩრდილოატლანტიკური ალიანსი, რომელიც ჩვენი საზღვრებისკენ მიიწევდა“, - განაცხადა მან.

2022 წლის თებერვალში, უკრაინაში შეჭრის გამოცხადებისას, პუტინმა განაცხადა, რომ „სპეციალური სამხედრო ოპერაციის“ ერთ-ერთი მიზანი იყო „ნატოს სამხედრო მანქანის“ რუსეთის საზღვრებისკენ წინსვლის წინააღმდეგობის გაწევა. თუმცა, სწორედ რუსეთის ამ აგრესიული ქმედებების შემდეგ შეუერთდნენ ფინეთი და შვედეთი ალიანსს. შედეგად, რუსეთის საზღვარი ნატოსთან გაორმაგდა, 1300 კილომეტრით.

შვედეთისა და ფინეთის ნატოში გაწევრიანების განაცხადის წარდგენისთანავე, პუტინმა განაცხადა, რომ მოსკოვი ამას საფრთხედ არ აღიქვამდა. „თუ მათ ეს სურთ, შეუძლიათ“, - თქვა მან მაშინ.

ავტორი: ექსპრესნიუსი,

სოციალური ქსელები

ნიუ-იორკის სასამართლომ ქართველ ნაცისტს ყასაბის სახელით ცნობილ იხეილ ჩხიკვიშვილს 15 წლით თავისუფლების აღკვეთა მიუსაჯა

მარკეტა გრეგოროვა: „იმედმა“ და სხვა პროსამთავრობო არხებმა ევროპარლამენტის წესები დაარღვიეს

ტროტუარზე დგომის საბაბით ბუკა პეტრიაშვილს 3-დღიანი პატიმრობა შეუფარდეს

საქართველოს ბანკისა და UN Women-ის მხარდაჭერით, „ბაზარი ორბელიანზე“ მეწარმე ქალების პროდუქციის გამოფენა-გაყიდვა გაიმართება