დღეს, 10 მარტს დილით აფეთქებები იყო რუსეთის სამარის ოლქის ქალაქ ნოვოკუიბიშევსკში, სადაც მდებარეობს არაერთი საწარმო, მათ შორის ნავთობგადამამუშავებელი და ნავთობქიმიური ქარხნები.

ადგილობრივი ტელეგრამ-არხების ცნობით, უკრაინული დრონებით შეტევა იყო ნავთობგადამამუშავებელ ქარხანაზე, რომელიც კომპანია „როსნეფტს“ ეკუთვნის.

სამარის ოლქის გუბერნატორმა ვიაჩესლავ ფედორიშჩევმა სოციალური ქსელებით გაავრცელა ცნობა, რომ სამი უპილოტო საფრენი აპარატი „უშედეგოდ ცდილობდა“ ნოვოკუიბიშევსკის საწარმოებზე შეტევას, თუმცა, სამივე ლიკვიდირებულია და ხანძარი და დაზიანებები არ ყოფილა.

ამასთან, რუსეთის სახელმწიფო სააგენტო „ტასი“ საგანგებო სიტუაციების სამმართველოზე დაყრდნობით წერდა, რომ ნოვოკუიბიშევსკში, სასაწყობე შენობებში ხანძარი გაჩნდა 1500 კვადარტული მეტრის ფართობზე და ერთ-ერთის სახურავი ჩამოინგრა, თუმცა არავინ დაღუპულა და დაშავებულა. ვის ეკუთვნის ეს საწყობი და რამ გამოიწვია ხანძარი, დაკონკრეტებული არ ყოფილა.

ამასთან, როგორც სააგენტო „ტასი“ წერს, ფედერალური უწყების, „როსპოტრებნადზორის“ სამარის სამმართველომ დაიწყო ჰაერის დამაბინძურებელი ნივთიერებების კონცენტრაციის კვლევა და ხანძრის ადგილიდან ახლოს მცხოვრებ მოქალაქეებს მიმართა, თავი შეიკავონ ღია სივრცეში ყოფნისგან, ან რესპირატორი გამოიყენონ, ფანჯრები დახურონ, ბევრი სითხე მიიღონ და საჭიროების შემთხვევაში ექიმს მიმართონ.

უკრაინის ეროვნული უსაფრთხოებისა და თავდაცვის საბჭოსთან არსებული, დეზინფორმაციასთან ბრძოლის ცენტრის ხელმძღვანელი ანდრი კოვალენკო ტელეგრამ-არხზე წერს, რომ შეტევა იყო სწორედ ნოვოკუიბიშევსკის ნავთობგადამამუშავებელ ქარხანაზე, რომლის საწარმოო სიმძლავრე წელიწადში 8,8 მილიონ ტონა ნავთობს აღწევს, რუსეთის უმსხვილესი ქარხნების ათეულშია და საწვავით ამარაგებს რუსულ არმიასაც.

დილით, რუსეთის თავდაცვის სამინისტრომ ხმელეთზე შედეგების დაკონკრეტების გარეშე განაცხადა, რომ სამარის ოლქში სამი უკრაინული უპილოტო საფრენი აპარატი ჩამოაგდეს.

ავტორი: ექსპრესნიუსი,

სოციალური ქსელები

რუსეთი საწვავის შოკის წინაშე დგას: ბენზინის ფასები ერთ წელიწადში 20%-ით გაიზარდა

„საშინელი და უპრეცედენტო რეკორდი“ - რუსეთის არმიის დანაკარგებმა უკრაინაში 1.4 მილიონს მიაღწია

პროკურატურამ არასრულწლოვანი შვილების მიმართ ჩადენილი ტრეფიკინგის ფაქტზე 3 პირს ბრალდება წარუდგინა

ლაიენი: სამხრეთ კავკასია მსოფლიოს უდიდესი გზაჯვარედინია, სტრატეგიული მნიშვნელობა ზრდას აგრძელებს და აზერბაიჯანს ცენტრალური როლი აქვს