მარნეულის 69-ე უბანზე მომხდარ ფაქტთან დაკავშირებით დაკავებულ საკრებულოს თავმჯდომარის მოადგილესა და კიდევ ერთ პირს პატიმრობა შეეფარდათ

2024-11-01 17:07:45, 480 ნახვა

სამართალი

მარნეულის 69-ე უბანზე, საარჩევნო ყუთში ბიულეტენების ჩაყრის ფაქტზე დაკავებულ საკრებულოს თავმჯდომარის მოადგილე როვშან ისკანდაროვსა და ექბარ ისკანდაროვს აღკვეთის ღონისძიების სახით პატიმრობა შეეფარდათ.

აღნიშნული გადაწყვეტილება მოსამართლე გვანცა ჩიქოვანმა მიიღო.

სისხლის სამართლის საქმეზე წინასასამართლო სხდომა 25 დეკემბერს, 14:00 საათზე ბოლნისის სასამართლოში ჩაინიშნა.

შეგახსენებთ, პოლიციამ სადახლოს საარჩევნო უბანზე მომხდარ ფაქტთან დაკავშირებით 2 პირი 31 ოქტომბერს დააკავა.

შინაგან საქმეთა სამინისტროს ოფიციალური ინფორმაციით, გამოძიებით დადგინდა, რომ ბრალდებულებმა, საქართველოს პარლამენტის 2024 წლის 26 ოქტომბრის არჩევნების მიმდინარეობისას, მარნეულის მუნიციპალიტეტის სოფელ სადახლოს №69-ე საარჩევნო უბანზე, კანონმდებლობის დარღვევით ყუთში საარჩევნო ბიულეტენები მოათავსეს, რამაც აღნიშნულ უბანზე ხმის მიცემის პროცესის შეწყვეტა და კენჭისყრის შედეგების ბათილად ცნობა გამოიწვია.

პროკურატურამ არჩევნების გაყალბების ფაქტზე 2-ვე პირს ბრალდება 31 ოქტომბერს წარუდგინა.

დაკავებულებს ბრალდება საქართველოს სისხლის სამართლის კოდექსის 164³-ე მუხლით (არჩევნების გაყალბება) წარედგინა, რაც სასჯელის სახედ და ზომად 2 წლამდე თავისუფლების აღკვეთას ითვალისწინებს.

Patreon P მხარი დაუჭირე "ექსპრესნიუსს" →

ავტორი: ექსპრესნიუსი,