2024-10-23 16:46:26, 497 ნახვა

---

ოჯახის წევრის მიმართ მუქარისა და გაუპატიურების ფაქტებზე ბრალდებულს სააპელაციომ სასჯელი დაუმძიმა და 11-წლიანი პატიმრობა მიუსაჯა

საქართველოს პროკურატურის მიერ წარდგენილი მტკიცებულებების საფუძველზე ოჯახში ძალადობის, ოჯახის წევრის მიმართ მუქარისა და გაუპატიურების ფაქტებზე ბრალდებულს, სააპელაციო სასამართლომ სასჯელი დაუმძიმა და თელავის რაიონული სასამართლოს მიერ შეფარდებული 2 წლის ნაცვლად 11 წლით თავისუფლების აღკვეთა მიუსაჯა. ამის შესახებ ინფორმაციას საქართველოს პროკურატურა ავრცელებს.

პროკურატურის ცნობით, თბილისის სააპელაციო სასამართლომ გაიზიარა ბრალდების მხარის პოზიცია და ოჯახის წევრის მიმართ მუქარისა და გაუპატიურების ფაქტებზე თელავის რაიონული სასამართლოს გამამართლებელი გადაწყვეტილება გამამტყუნებლით შეცვალა და მსჯავრდებულ პირს სასჯელი დაუმძიმა.

"ბრალდების მხარის მიერ სასამართლო პროცესზე გამოკვლეული მტკიცებულებებით დადასტურდა, რომ ბრალდებული მეუღლეს სისტემატურად აყენებდა სიტყვიერ შეურაცხყოფას. ასევე, დაემუქრა მას სიცოცხლის მოსპობით და ძალადობითა და ძალადობის მუქარით გააუპატიურა დაზარალებული.

გამოკვლეული მტკიცებულებებით ასევე დადასტურდა, რომ ნარკოტიკული დანაშაულის ჩადენისათვის ნასამართლევმა ბრალდებულმა უკანონოდ შეიძინა და შეინახა ნარკოტიკული საშუალება „მარიხუანა". 

თელავის რაიონულმა სასამართლომ ბრალდებული დამნაშავედ ცნო ოჯახის წევრის მიმართ სისტემატური შეურაცხყოფის მიყენების (სისხლის სამართლის კოდექსის 126-ე პრიმა მუხლის პირველი ნაწილით) და ნარკოტიკული დანაშაულის ჩადენისათვის, ნასამართლევი პირის მიერ მარიხუანას უკანონო შეძენა-შენახვისთვის (273-ე პრიმა მუხლის მე-3 ნაწილის „გ" ქვეპუნქტით) და სასჯელის სახედ და ზომად 2 წლით თავისუფლების აღკვეთა განუსაზღვრა.

სასამართლომ ამავე განაჩენით ბრალდებული გაამართლა ოჯახში ძალადობის და ოჯახის წევრის მიმართ მუქარის, გამოძალვის, დამამცირებელ და არაადამიანურ მოპყრობასა და გაუპატიურების ფაქტებზე.

თბილისის სააპელაციო სასამართლომ გაიზიარა ბრალდების მხარის პოზიცია, ოჯახის წევრის მიმართ ჩადენილ მუქარასა (11 პრიმა, 151-ე მუხლის მე-2 ნაწილის „დ" ქვეპუნქტი) და გაუპატიურებაზე (11 პრიმა, 137-ე მუხლის მე-3 ნაწილის „ე" ქვეპუნქტი) და გამამართლებელი გადაწყვეტილება შეცვალა გამამტყუნებლით. თელავის რაიონული სასამართლოს განაჩენით მსჯავრდებული პირისთვის დანიშნული სასჯელი დაამძიმა და 2 წლის ნაცვლად 11 წლით თავისუფლების აღკვეთა მიუსაჯა",- ნათქვამია ინფორმაციაში.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი