ჯანდაცვის სამინისტროში აქონდროპლაზიის სინდრომის მქონე ბავშვების მშობლებისა და მინისტრის მოადგილის, თამარ გაბუნიას შეხვედრა დასრულდა.

როგორც აქონდროპლაზიის სინდრომის მქონე ბავშვის მშობელი, მაკა გოჩიაშვილი სოციალურ ქსელში წერს, ჯანდაცვის სამინისტრო გარანტიისთვის დოკუმენტს, ამ ეტაპზე, ვერ იძლევა და პროტესტი ისევ გაგრძელდება.

"ახლა გამოვედით ჯანდაცვის სამინისტროდან მშობლები. წამლის შემოტანა-არ შემოტანაზე აღარც გვეკამათებიან და ეს ძალიან კარგია.

სამოქმედო გეგმა გაგვაცნეს და თანმიმდევრული და სწორი გეგმაა, ჩვენი მონაწილეობაც გათვალისწინებული აქვთ და სრული სიფხიზლით ვიქნებით ჩართულები, რომ არ გადავუხვიოთ გეგმიდან.

გარანტიისთვის დოკუმენტს, ამ ეტაპზე, ვერ გვაძლევენ და ამიტომ მუშაობის პარალელურად, პროტესტი იმავე ფორმით გრძელდება. შემდეგი შეხვედრა 5 მაისს ჩავინიშნეთ",- წერს გოჩიაშვილი.

ამასთან, აქონდროპლაზიის სინდრომის მქონე ბავშვის მშობელის, ქეთი ბეგიაშვილის თქმით, თამარ გაბუნიამ ვერ შეძლო დაესახელებინა კონკრეტული თარიღი, როდის შემოვა მედიკამენტი საქართველოში. 

"ერთიანად ყველა აღიარებს, რომ მედიკამენტი ერთადერთია აქონდროპლაზიის სამკურნალოდ, რომ კარგია და აუცილებელია, რომ შემოვიდეს - ეს უკვე ჩვენთვის ძალიან კარგი და წინ გადადგმული ნაბიჯია, მაგრამ თქვენ კარგად იცით, ჩვენ ვამბობდით, რომ გვჭირდებოდა გარანტიები, თუ როდის იქნება მედიკამენტი საქართველოში შემოტანილი [...] ქალბატონმა თამარმა ამასთან დაკავშირებით განაცხადა, რომ მას არ შეუძლია, დროის განსაზღვრაზე კომენტარი გააკეთოს. ჩვენ ვაგრძელებთ პროტესტს ისევ იქ, კანცელარიასთან, რადგან უკვე მოვითხოვოთ სარწმუნო საბუთი, რომ ნამდვილად იქნება მედიკამენტი შემოტანილი",- განაცხადა ბეგიაშვილმა.

შეგახსენებთ, აქონდროპლაზიის სინდრომის მქონე ბავშვების მშობლები, დაახლოებით, ორი კვირაა, რაც მთავრობის ადმინისტრაციასთან აქციებს მართავენ და ქვეყანაში მედიკამენტ "ვოზორიტიდის" შემოტანას ითხოვენ. დედები პრემიერ-მინისტრ ირაკლი ღარიბაშვილთან შეხვედრასაც ცდილობდნენ, მაგრამ აუდიენცია არ შემდგარა.

24 აპრილს, ირაკლი ღარიბაშვილი მთავრობის სხდომაზე მშობლებს გამოეხმაურა და აღნიშნა, რომ "როგორც კი რამდენიმე ქვეყანა დაიწყებს გაიდლაინით მკურნალობას", საქართველო პროგრამაში ჩაერთვება. მთავრობის მეთაურის თქმით, მედიკამენტის შემოტანაზე "ცოტა მოცდაა საჭირო".

აღსანიშნავია, რომ დედებთან შეხვედრა გამართა საქართველოს პრეზიდენტმა, სალომე ზურაბიშვილმა. ზურაბიშვილი აღნიშნულის შემდეგ, ჯანდაცვის მინისტრს, ზურაბ აზარაშვილსაც შეხვდა და აქონდროპლაზიის დიაგნოზის მქონე ბავშვების მკურნალობის საკითხზე სამინისტროს სამოქმედო გეგმების შესახებ ინფორმაცია მოისმინა.

მშობლების აქციაზე რამდენჯერმე მივიდა სახალხო დამცველიც. ლევან იოსელიანმა თქვა, რომ ომბუდსმენის აპარატი, ჯანდაცვის სამინისტროსთან ერთად, პროცესში აქტიურადაა ჩართული და აქციის მონიტორინგს ახორციელებს.

უფრო ადრე, დედებთან შეხვედრა გამართა თვითონ ზურაბ აზარაშვილმა, რომელმაც თქვა, რომ "თუ ევროკავშირის წევრი რამდენიმე ქვეყანა, აიღებს პასუხისმგებლობას და სახელმწიფო ბიუჯეტიდან დააფინანსებს აქონდროპლაზიის ახლად შექმნილ სამკურნალო მედიკამენტს, საქართველო იქნება მსოფლიოში ერთ-ერთი მოწინავე ქვეყანა, რომელიც ამ პასუხისმგებლობას გაიზიარებს და წამლის შესყიდვისთვის საჭირო პროცედურებს განახორციელებს".

ამასთან, გუშინ, 1-ელ მაისს ჯანდაცვის მინისტრმა, ზურაბ აზარაშვილმა, აქონდროპლაზიის დიაგნოზის მქონე ბავშვების მშობლები სამუშაო მაგიდასთან შეთანხმებებისთვის, მოლაპარაკებებისთვის და საპროტესტი აქციების შეწყვეტისთვის მიიწვია.

ავტორი: ექსპრესნიუსი,

სოციალური ქსელები

iFact: სანქცირებული ტანკერის ტვირთი ყულევის პორტში ჩავიდა

პარლამენტმა სახელმწიფო ქონება იმპორტზე აქციზის გადასახადისგან გაათავისუფლა

რუსეთმა შეერთებულ შტატებს ევროპიდან ყველა ბირთვული იარაღის გაყვანა მოსთხოვა

პუტინის ბირთვული მუქარის შემდეგ ნატოს ქვეყნებმა რეკორდული ტემპით ჩადეს ინვესტიციები ბირთვულ იარაღში