„მზად ვარ მისასვლელად, ჩართვის ხარისხი არ მაკმაყოფილებს“ - ექიმებმა სააკაშვილის სასამართლოზე დასწრების რეკომენდაცია არ გასცეს

2023-01-17 12:27:55, 1024 ნახვა

პოლიტიკა

მკურნალმა ექიმმა მიხეილ სააკაშვილის ტრანსპორტირების რეკომენდაცია არ გასცა, ის სასამართლო პროცესს დღესაც არ დაესწრება,- აღნიშნულის შესახებ მოსამართლე გიორგი არევაძემ სხდომის დასაწყისში განაცხადა.

არევაძემ კლინიკა „ვივა მედიდან“ გაგზავნილი წერილი წაიკითხა, სადაც მიხეილ სააკაშვილს სასამართლოზე ფიზიკურად დასწრება სურდა, თუმცა მას ამის უფლება კლინიკის ექიმის რეკომენდაციით არ მიეცა.

„მზად ვარ მისასვლელად, ჩართვის ხარისხი არ მაკმაყოფილებს“,- წერს სააკაშვილი.

როგორც გიორგი არევაძემ განაცხადა, მსჯავრდებულისთვის შეთავაზებული იქნა დისტანციურად ჩართვა, რაზეც მან უარი განაცხადა

„ჩვენს მიერ, აღნიშნული მსჯავრდებულისთვის შეთავაზებული იქნა დისტანციურად ჩართვა, რაზეც მან უარი განაცხადა და ითხოვს სასამართლოზე წარდგენას. მკურნალი ექიმის განმარტებით, მსჯავრდებულს არ აძლევს სასამართლოზე ტრანსპორტირების რეკომენდაციას“,- განაცხადა არევაძემ.

შეგახსენებთ, რომ თბილისის საქალაქო სასამართლში საქართველოს მესამე პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებული სასამართლო პროცესი მიმდინარეობს.

სასამართლო პროცესზე ნობელის პრემიის ლაურეატი ექიმი ჯეიმს კობი დაიკითხება. გარდა ამისა, როგორც მესამე პრეზიდენტის უფლებადამცველმა, შალვა ხაჭაპურიძემ ჟურნალისტებს პროცესის დაწყებამდე განუცხადა, დაცვის მხარე, მოწმეთა დაკითხვის რეგლამენტის განსაზღვრის მიზნით, შუამდგომლობის დაყენებას აპირებს.