მიწისქვეშა გადასასვლელებში და კულტურული მემკვიდრეობის ობიექტებზე პლაკატების გაკვრა ჯარიმას გამოიწვევს

2015-02-04 11:31:25, 806 ნახვა

საზოგადოება

თბილისში მიწისქვეშა გადასასვლელებში და კულტურული მემკვიდრეობის ობიექტებზე საინფორმაციო მასალების განთავსება დაჯარიმებას გამოიწვევს.

როგორც დედაქალაქის მერმა დავით ნარმანიამ ჟურნალისტებს განუმარტა, მიწისქვეშა გადასასვლელებში სხვადასხვა სახის პლაკატებისა და საინფორმაციო მასალის განთავსება, პირველ ჯერზე 50 ლარიან ჯარიმას გამოიწვევს, განმეორების შეთხვევაში კი, ჯარიმა 500 ლარი იქნება.

მისივე თქმით, კულტურული მემკვიდრეობის ობიექტებზე ასეთი სახის მასალის განთავსებაზე ჯარიმა უფრო მეტია. პირველ ჯერზე ჯარიმა 1000 ლარი იქნება, განმეორების შემთხვევაში კი ჯარიმა 2000 ლარამდე გაიზრდება.

აქვე, დედაქალაქის მერმა არქიტექტურის სამსახურს დავალება მისცა, სტენდების პირველადი მონახაზი გააკეთონ, რომლებიც დედაქალაქში დაიდგმება, სადაც საინფორმაციო მასალა განთავსდება.

„ბოლო 2 კვირაა მიწისქვეშა გადასასვლელების მოწესრიგება, მათი დასუფთავება, მორეცხვა და დეზინფექცია გრძელდება. მხოლოდ მუნიციპალიტეტის აქტიურობით ჩვენ ამ საერთო პრობლემას ვერ მოვაგვარებთ. მოქალაქეებს ვთხოვ, სისუფთავე დაიცვან, წინააღმდეგ შემთხვევაში იძულებულნი ვიქნებით, ადმინისტრაციულ სამართალდარღვევათა კოდექსის შესაბამისად მოვახდინოთ მათი დაჯარიმება“,– აღნიშნა ნარმანიამ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან