აშშ-ის ნარკოტიკებისა და სამართალდაცვის საქმეთა საერთაშორისო ბიუროს კინოლოგიის პროექტი დასრულდა

2015-10-02 14:45:34, 734 ნახვა

სამართალი

თბილისის საერთაშორისო აეროპორტის მოფრენის დარბაზში, კინოლოგიის პროექტის დასრულების ოფიციალური ცერემონია გაიმართა.

ოფიციალური ცერემონიის ფარგლებში თბილისის აეროპორტის სპეციალური დანიშნულების სწრაფი რეაგირების რაზმის წარმომადგენლებმა ნარკოტიკების მოძიებაზე გაწვრთნილ ძაღლებთან ერთად წარმოადგინეს სიმულაციური ჩვენება - ბარგსა და ხელბარგში დამალული ნარკოტიკული საშუალებების პოვნისა და ამოღების პროცესი, რომელშიც ხუთი ძაღლი მონაწილეობდა.

ცერემონიაში მონაწილეობდნენ საქართველოს ფინანსთა მინისტრი ნოდარ ხადური, შინაგან საქმეთა მინისტრი გიორგი მღებრიშვილი, საქართველოში ამერიკის შეერთებული შტატების ელჩი იან კელი, ამერიკის შეერთებული შტატების ნარკოტიკებისა და სამართალდაცვის საქმეთა საერთაშორისო ბიუროს (INL) წარმომადგენლები და სხვა ოფიციალური პირები.

კინოლოგიის პროექტი დაიგეგმა და განხორციელდა ამერიკის შეერთებული შტატების ნარკოტიკებისა და სამართალდაცვის საქმეთა საერთაშორისო ბიუროს პროგრამის ფარგლებში.

პროექტის მეშვეობით, საქართველოს შინაგან საქმეთა სამინისტროსა და საქართველოს ფინანსთა სამინისტროს შემოსავლების სამსახურის ბაზაზე შეიქმნა თბილისის აეროპორტის სპეციალური დანიშნულების სწრაფი რეაგირების რაზმი, რომლის ამოცანა ძაღლების დახმარებით ნარკოტიკების აღმოჩენა და ნარკოდანაშაულებრივი ჯგუფების მხრიდან მოსალოდნელი საფრთხეების მნიშვნელოვანი შემცირებაა. სწრაფი რეაგირების რაზმის ეფექტურად მუშაობის მიზნით, 2013 წლის ივნისში შემოსავლების სამსახურსა და შსს-ის ცენტრალური კრიმინალური პოლიციის დეპარტამენტს, საპატრულო პოლიციის დეპარტამენტსა და საექსპერტო–კრიმინალისტიკურ მთავარ სამმართველოს შორის გაფორმდა მემორანდუმი თანამშრომლობის შესახებ.

ნარკოტიკების მაძიებელი ძაღლები, რომელთა დანიშნულება მგზავრების, ბარგისა და საფოსტო გზავნილების შემოწმებაა, აშშ-ის ნარკოტიკის მოხმარების კონტროლის ადმინისტრაციამ (DEA) გაწვრთნა. პროექტის ფარგლებში, 2014 წელს, ამერიკის შეერთებულ შტატებში გაიმართა კინოლოგთა რვაკვირიანი ტრენინგი, რომლის დასრულების შემდეგაც სერტიფიცირებული კინოლოგები გაწვრთნილ ძაღლებთან ერთად ჩამოვიდნენ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან