ღარიბაშვილი: მადლობა მთავარ სტრატეგიულ პარტნიორს დახმარებისთვის

2020-12-23 00:17:08, 838 ნახვა

სამხედრო

„მინდა, მადლიერებით კიდევ ერთხელ ამ ტრიბუნიდან მივმართო და მადლობა გადავუხადო ჩვენს მთავარ სტრატეგიულ პარტნიორს იმ დახმარებისთვის, რომელსაც ამერიკის მთავრობა უწევს ქართულ ჯარს. ეს ყოველწლიური დახმარება წლიდან წლამდე იზრდება. გაისად ეს თანხა შეადგენდა 35 მილიონ დოლარს. ეს იყო რეკორდული დახმარება გრანტის სახით, რომელიც მივიღეთ“, - ამის შესახებ ირაკლი ღარიბაშვილმა პარლამენტის კომიტეტების გაერთიანებულ სხდომაზე განაცხადა.

თავდაცვის მინისტრობის კანდიდატმა განსაკუთრებული ყურადღება გაამახვილა აშშ-საქართველოს ერთობლივ საქართველოს თავდაცვის მზადყოფნის პროგრამაზე (GDRP), რომელიც წარმატებით ხორციელდება.

„მქონდა პატივი, გამეგრძელებინა ეს ხელშეკრულება, გამეფორმებინა სამწლიანი ხელშეკრულება გასული წლის ნოემბრის თვეში, როდესაც აშშ-ში ვიმყოფებოდი. ჩარჩო-ხელშეკრულება მოიცავს რეალურად ჩვენი თავდაცვის ძალებისა და ბატალიონების გადამზადებას, რაც, რა თქმა უნდა, არის წარმატების ერთ-ერთი საუკეთესო მაგალითი“, - განაცხადა მან.

ირაკლი ღარიბაშვილმა ნატოსთან ურთიერთობის მიმართულებით გადადგმულ ნაბიჯებზეც ისაუბრა.

„მოგეხსენებათ, რომ SNGP-ის განახლებული პაკეტი, რომელიც ახლა დეკემბრის თვეში დამტკიცდა, წარმატებით ხორციელდება. მისი საბოლოო მიზანია, თავდაცვის ძალები გახდეს კიდევ უფრო ქმედითი, კიდევ უფრო მდგრადი და ძლიერი. რაც მთავარია, ჩვენი ქართული ჯარი გახდეს კიდევ უფრო მეტად თავსებადი ნატოსთან. SNGP-ის ფარგლებში ჩამოყალიბებული წვრთნისა და შეფასების ერთობლივი ცენტრი (JTEC) წარმატებით აგრძელებს ფუნქციონირებას.

მინდა გითხრათ, რომ მიუხედავად პანდემიისა, ჩვენ სისტემატურად ვცვლით ინფორმაციებს როგორც ნატოს ქვეყნებთან, ბრიუსელის შტაბბინასთან, ასევე ჩვენს ამერიკელ კოლეგებთან. მინდა კიდევ ერთხელ გავიმეორო, რომ პანდემიის მიუხედავად, ჩვენ ვაგრძელებთ ამ წვრთნებს და გვაქვს ინტენსიური გაცვლა“, - განაცხადა თავდაცვის მინისტრობის კანდიდატმა.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),