2020-02-20 18:35:28, 1376 ნახვა

---

სერგი კაპანაძე რუსეთის „გრუ“-ს მიერ განხორციელებულ კიბერშეტევაზე - გასაკვირი არაფერია, საქართველოსთვის ეს ახალი ამბავი არ არის

„არაფერი გასაკვირი არ არის იმაში, რომ ასეთი კიბერშეტევა მოდიოდა რუსეთის მხრიდან და მათი უშიშროების სამსახურიდან“, - ასე ეხმაურება „ევროპული საქართველოს“ წევრი სერგი კაპანაძე რუსეთის „გრუ“-ს მიერ განხორციელებულ კიბერშეტევას.

მისი თქმით, მსგავსი კიბერშეტევები ქვეყანაზე 2008 წლის ომის შემდგომ პერიოდულად ხორციელდებოდა.

„არაფერი გასაკვირი არ არის იმაში, რომ ასეთი კიბერშეტევა მოდიოდა რუსეთის მხრიდან და მათი უშიშროების სამსახურიდან. ეს ახალი ამბავი საქართველოსთვის არ არის. ჯერ კიდევ 2008 წლის ომის დროს განხორციელდა მსგავსი რამ და იმის მერე პერიოდულად ხდებოდა ხოლმე. ამიტომ რამე სიახლე ამ განცხადებაში ბუნებრივია არ არის. აქ საინტერესოა, საქართველოს ხელისუფლება ამ ბოლო წლებში რას აკეთებდა იმისთვის, რომ ამის პრევენცია მოეხდინა და სხვა მსგავს შემთხვევებზე როგორი რეაგირება მოახდინა. ყველა ჩვენთაგანისთვის მეორე საყურადღებო ამბავი იქნება ის, რომ ხომ არ მოხდება ამ შეტევის გამოყენება იმის საბაბად, რომ თვითონ უფრო მეტი კონტროლი აიღოს მთავრობამ და უშიშროების სამსახურებმა ინტერნეტის კონტროლზე ქვეყნის შიგნით და შემდეგ ეს გამოიყენოს სხვა მიზნებისთვის“, - განაცხადა სერგი კაპანაძემ.

ცნობისთვის,  საქართველოს საგარეო საქმეთა სამინისტროს წარმომადგენელმა ვლადიმერ კონსტანტინიდმა უწყებაში გამართულ ბრიფინგზე განაცხადა, რომ 2019 წლის 28 ოქტომბერს საქართველოში განხორციელდა ფართომასშტაბიანი კიბერშეტევა საქართველოს პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოების, სახელმწიფო, კომერციული და მედია ორგანიზაციების ვებ-გვერდებზე, სერვერებსა და სხვა მართვით სისტემებზე.  კიბერშეტევის შედეგად დაზიანდა ზემოაღნიშნული ორგანიზაციების სერვერები, მართვითი სისტემები და მნიშვნელოვნად შეფერხდა მათი ფუნქციონირება.

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი