საქართველოში მიმდინარე რეფორმების, ჯანსაღი ბიზნესგარემოსა და ხელსაყრელი საინვესტიციო კლიმატის შედეგია ის, რომ მთელი ამ წლების განმავლობაში იტალიელი ბიზნესმენები ინარჩუნებენ ბიზნესის განვითარებისა და ინვესტიციების განხორციელების ინტერესს, - ამის შესახებ საქართველოს პრემიერ-მინისტრმა მამუკა ბახტაძემ საქართველო-იტალიის ბიზნესფორუმზე სიტყვით  გამოსვლისას განაცხადა.

პრემიერის თქმით, მხოლოდ წელიწად-ნახევრის განმავლობაში საქართველოსა და იტალიას შორის უკვე მესამე ბიზნესფორუმი იმართება, რაც კიდევ ერთხელ ნათლად მიუთითებს იმაზე, რომ ორ ქვეყანას შორის სავაჭრო პოტენციალი საკმაოდ მაღალია.

“დღეს მე მქონდა საშუალება, ბატონი პრეზიდენტისა და დელეგაციის წევრებისთვის, ჩვენი მეგობრებისთვის გამეცნო ის ხედვა, რაც ჩვენ გვაქვს საქართველოს ადგილსა და როლთან დაკავშირებით. საქართველო ემსახურება 8 ქვეყანას, რომელსაც არ აქვს ზღვაზე გასასვლელი და ჩვენ მათთვის კარიბჭე ვართ. ჩვენ ვახორციელებთ მნიშვნელოვან ინფრასტრუქტურულ პროექტებს, რომ საქართველოს, როგორც ტრანზიტული ქვეყნის როლი კიდევ უფრო გავზარდოთ. ჩვენ გვაქვს ძალიან მნიშვნელოვანი მიღწევები და წინაპირობები იმისთვის, რომ საქართველო ჰაბად იქცეს ამ რეგიონისთვის და განსაკუთრებით ამ 8 ქვეყნისთვის. ეს ნიშნავს იმას, რომ იტალიური საწარმოებისთვის საქართველოში ბიზნესის კეთება არ ნიშნავს მხოლოდ წვდომას 4-მილიონიან ბაზარზე. ეს ნიშნავს გაცილებით მეტს, ეს ნიშნავს იმას, რომ იტალიურ ბიზნესს საშუალება ექნება, თავისი ბიზნესაქტივობა განავითაროს რეგიონის სხვა ქვეყნებთან, სამხრეთ კავკასიისა და ცენტრალური აზიის ქვეყნებთან. ჩვენთვის ძალიან მნიშვნელოვანია, რომ იზრდება პირდაპირი უცხოური ინვესტიციები იტალიიდან ძალიან მნიშვნელოვან სფეროებში. საქართველოში ინვესტიციების განხორციელების თვალსაზრისით ძალიან მსხვილი კომპანიები მონაწილეობენ, განსაკუთრებით მინდა გამოვყო „აგრიჯორჯია“, რომელიც ძალიან მნიშვ ნელოვან საქმიანობას ახორციელებს, FERERO, რომელიც ამ სექტორის გლობალური ლიდერია. ჩვენ ძალიან მოხარული ვართ, რომ უფრო და უფრო მეტ იტალიურ კომპანიას ვხედავთ ჩვენს ინფრასტრუქტურულ პროექტებში. ჩვენი ამოცანაა 2021 წლის ჩათვლით დავასრულოთ ყველა ძირითადი ინფრასტრუქტურული პროექტი, რომელიც მოიცავს, როგორც აღმოსავლეთ-დასავლეთის დერეფანს, ასევე - ჩრდილ-სამხრეთის დერეფანს. მოხარული ვართ, რომ იტალიური კომპანიები მონაწილეობენ არა მხოლოდ სამშენებლო საქმიანობაში, არამედ ძალიან მნიშვნელოვან პროექტირების სამუშაოებშიც, ვინაიდან საქართველო მთაგორიანი ადგილია და საკმაოდ კომპლექსურ საინჟინრო გადაწყვეტილებებს მოითხოვს ის პროექტები, რომლებზეც ჩვენ ვსაუბრობთ. იტალიური კომპანიებს ამ კუთხით აქვთ ძალიან კარგი გამოცდილება და ვენ მოხარული ვართ, რომ ვგრძნობთ მათ გაზრდილ აქტივობას”, - განაცხადა მამუკა ბახტაძემ.

ავტორი: ,

სოციალური ქსელები

მოსკოვის ნავთობგადამამუშავებელი ქარხანა კიდევ უფრო დაზიანდა ერთი კვირის განმავლობაში მეორეჯერ თავდასხმის შედეგად.

დიდმა ბრიტანეთმა, გერმანიამ და ნატოს კიდევ ხუთმა ქვეყანამ უკრაინას ასობით მილიონი დოლარის ღირებულების დრონებისა და რაკეტების ახალი მიწოდება დაჰპირდნენ

ცოლის ინფორმაციით, ბაქოს სააპელაციო სასამართლომ აფგან სადიგოვი პატიმრობაში დატოვა

ურეკში 4 ადამიანი ზღვის დინებამ წაიღო, მაშველებმა 4-ვე გამოიყვანეს, თუმცა 1 დაიღუპა