თსუს-ს იურიდიული ფაკულტეტის სტუდენტებისა და კურსდამთავრებულების ნაწილი უნივერსიტეტიდან 2 ლექტორის, ირინა ხერხეულიძისა და გიორგი ცერცვაძის გათავისუფლებას აპროტესტებს. ისინი ამბობენ, რომ პროფესორები სამსახურიდან პოლიტიკური ნიშნით გაუშვეს.

"თსუ-ს იურიდიული ფაკულტეტის სტუდენტები და კურსდამთავრებულები ვაპროტესტებთ პროფესორების გათავისუფლებას, რაც აშკარად პოლიტიკური მოტივებით არის განპირობებული. წლების განმავლობაში, ეს ლექტორები მაღალი აკადემიური სტანდარტებით, სტუდენტების მხარდაჭერით, პრინციპულობითა და დემოკრატიული ღირებულებების ერთგულებით გამოირჩეოდნენ. მათი წვლილი დიდია უნივერსიტეტში კრიტიკული აზროვნების განვითარებაში. მათი დათხოვნა გამოხატვისა და აკადემიური თავისუფლების, დემოკრატიული პრინციპების უხეშ დარღვევას წარმოადგენს, რაც უნივერსიტეტისთვის, როგორც ცოდნისა და თავისუფალი აზრის სივრცისთვის მიუღებელია. 

გარდა ამისა, მოვითხოვთ, თსუ-ს ადმინისტრაციამ მათი გათავისუფლების გადაწყვეტილების საფუძვლები საჯაროდ განმარტოს და გამჭირვალე არგუმენტები წარმოადგინოს - და პოლიტიკური ჩარევისგან აკადემიური სივრცის დაცვა უზრუნველყოს. უნივერსიტეტში გარანტირებული იყოს აკადემიური თავისუფლება და პლურალიზმი". - თქვეს სტუდენტებმა და კურსდამთავრებულებმა. 

მათ ასევე განცხადებაში მხარდაჭერა გამოუცხადეს რეჟიმის პატიმრებსა და თეატრალური უნივერსიტეტის სტუდენტებს.

თბილისის სახელმწიფო უნივერსიტეტიდან ორი ლექტორი, ირინე ხერხეულიძე და გიორგი ცერცვაძე გაათავისუფლეს - არსებული ინფორმაციით, მათი გათავისუფლება პოლიტიკური ნიშნით მოხდა. 

"უნივერსიტეტიდან გამაგდეს. ახლა რომ ვაანალიზებ, უფრო ადრეც ვიყავი გასაგდები. დღეს თვალი ამეხილა და მინდა გულწრფელად მოვინანიო ის სამწუხარო რიალობა, რომ დიფ სთეითისა და გლობალური ომის პარტიის წისქვილზე ასე თავხედურად და აღვირახსნილი ცინიზმით ვასხამდი წყალს.

მონანიებისთვის, მზად ვარ, საკუთარი ხარჯით, ყოველგვარი სახელმწიფო და საუნივერსიტეტო დაფინანსების გარეშე, ერთი სემესტრით, გაცვლითი პროგრამით გავემგზავრო თურქმენეთში მისი აწ გარდაცვლილი (მშვიდობა მის სულს!) პრეზიდენტის, გურბანგული ბერდიმუხამედოვის ნაშრომების საკვლევად და სათარგმნად. იმედი მაქვს, ჩემი გულწრფელი სინანული შესმენილი იქნება მათ მიერ, ვისაც ამ უდიდესი აკადემიური შეცოდების პატიება შეუძლიათ. და მე დავბრუნდები უკან.

აქვე გთხოვთ, ხელფასი განმისაზღვროთ ერთ ლექციაში თუთხმეტი მანეთი და სამოცი კაპიკი.

ბოლოს, დიდი მადლობა კოლეგებს, რომლებმაც ცქვიტად აიღეს საკუთარ თავზე ჩემი საგნების წაკითხვა, რომლებიც ჩემამდე საერთოდ არ იკითხებოდა და ჩემი დანერგილი და შემოტანილია 2011 წლიდან. ასევე, თუ საჭირო გახდა, შემიძლია მივუთითო ერთ ორ ადამიანზე, ვინც საჯაროდ არ წერს, მაგრამ ზუსტად ვიცი, რომ გლობალური ომის პარტიის და დიფ სთეითის თაყვანისმცემელია. გულში. დავშთები მარად თქვენი მოწყალების ვედრებით მთხოვნელი." - დაწერა სოციალურ ქსელში ირინა ხერხეულიძემ. 

ავტორი: ექსპრესნიუსი,

სოციალური ქსელები

უკრაინამ ომის განმავლობაში მოსკოვის ოლქზე ყველაზე მასშტაბური თავდასხმის დროს ენერგეტიკული ობიექტები, თავდაცვის ინდუსტრიის საწარმო და შერემეტიევოს აეროპორტი დაბომბა

რუსეთის ძალებმა დნეპრისა და ოდესის საცხოვრებელ შენობებს იერიში მიიტანეს, რის შედეგადაც 20 ადამიანი დაშავდა

თბილისი პრაიდი: "ოცნებამ" სცადა, ქვიარ ადამიანები საზოგადოებრივი ცხოვრებიდან გავექრეთ

SJC: 17 მაისი საქართველოში „ოჯახის“ იდეის პოლიტიკური ინსტრუმენტალიზაციის სიმბოლური დღეა