2019-09-19 19:07:43, 3430 ნახვა

---

ეკატერინე მიქაბაძემ გეოლოგ-მენავთობეთა ამერიკული ასოციაციის რეგიონული სამუშაო შეხვედრაში მიიღო მონაწილეობა

18-19 სექტემბერს ბათუმში გეოლოგ-მენავთობეთა ამერიკული ასოციაციის (AAPG) ევროპის რეგიონული სამუშაო შეხვედრა გაიმართა, რომელსაც მსხვილი ნავთობმომპოვებელი კორპორაციების მაღალი რგოლის მენეჯმენტის წარმომადგენლები დაესწრნენ. ღონისძიების ქართველი პარტნიორები იყვნენ ნავთობისა და გაზის სააგენტო და საქართველოს ნავთობისა და გაზის კორპორაცია.

სამუშაო შეხვედრის მონაწილეებს მისასალმებელი სიტყვით მიმართა ეკონომიკისა და მდგრადი განვითარების მინისტრის მოადგილემ ეკატერინე მიქაბაძემ. მინისტრის მოადგილემ თავის გამოსვლაში აქცენტი გააკეთა ქვეყნის სტაბილურ ეკონომიკურ მაჩვენებლებსა და მიმდინარე ეკონომიკურ და სტრუქტურულ რეფორმებზე, აგრეთვე ლიბერალურ და პროგნოზირებად ბიზნესგარემოზე, რამაც კონფერენციის მონაწილეთა დიდი დაინტერესება გამოიწვია. სამუშაო შეხვედრაზე აღინიშნა, რომ ნავთობისა და გაზის მომპოვებელი კომპანიებისთვის პრიორიტეტულია ისეთი ქვეყნებში ინვესტიციების განხორციელება, სადაც სტაბილური ეკონომიკა, ძლიერი ინსტიტუციები და საშუალო და გრძელვადიან პერიოდზე გათვლადი ბიზნესგარემოა.

სამუშაო შეხვედრაზე ასევე განიხილეს ინფორმაცია საქართველოში ნავთობისა და გაზის პოტენციური საბადოების გეოლოგიური მდგომარეობისა და არსებულ საბადოებზე მიმდინარე ძებნა-მოპოვებითი სამუშაოების შესახებ. აღინიშნა, რომ საქართველოს ტერიტორია, განსაკუთრებით, მისი ტერიტორიული წყლები შავ ზღვაში ნაკლებად არის შესწავლილი ნახშირწყალბადების გეოლოგიური მარაგების არსებობის კუთხით. განსაკუთრებული დაინტერესება გამოიწვია პრეზენტაციამ, რომელიც წარადგინა ნავთობისა და გაზის სააგენტოს ხელმძღვანელმა გიორგი ტატიშვილმა. ითქვა, რომ საქართველომ დაასრულა ტენდერი ბევრ სახმელეთო ბლოკზე, ასევე იგეგმება საერთაშორისო  ტენდერის გამოცხადება, რომელიც მოიცავს შავი ზღვის შელფის ტერიტორიას.

სამუშაო შეხვედრაზე მსხვილმა ნავთობკომპანიებმა, როგორიცაა ExxonMobil, Total, OMV და ა.შ., წარმოადგინეს საკუთარი ხედვა აღნიშნულ რეგიონში მათი საქმიანობისა და სამომავლო პროექტების თაობაზე.

 

 

 

(NS)

---

ავტორი: ექსპრესნიუსი,

---

დღის თემა

მთავარი თემა

ინტერვიუ - ექსკლუზივი