კახა მამულაშვილი გაათავისუფლეს

2015-09-09 14:58:11, 857 ნახვა

სამართალი

პროდიუსერი კახა მამულაშვილი "მამულიჩა" გაათავისუფლეს. მისი პროცესი დღეს 13:00 საათზე მე-12 დარბაზში უნდა დაწყებულიყო. თუმცა, საბოლოოდ აღმოჩნდა, რომ სასამართლო სხდომა მე-18 დარბაზში გაიმართა ისე, რომ ჟურნალისტები მას არ დასწრებიან.
ამიტომ, ამ ეტაპზე უცნობია, რის საფუძველზე მოხდა კახა მამულაშვილის გათავისუფლება. "ექსპრესნიუსი" საქალაქო სასამართლოს პრესსამსახურს დაუკავშირდა, სადაც განაცხადეს, რომ მე-12 დარბაზში ტექნიკური პრობლემის გამო სხდომა ვერ გაიმართა, თუმცა იმის თაობაზე, რომ დარბაზი შეიცვალა და სხდომა მე-18 დარბაზში ტარდებოდა, თავადაც არ იცოდნენ.
"დარბაზები სასამართლოში ხშირად იცვლება. დარბაზების პრობლემა ზოგადად სასამართლოში არის. მე-12 დარბაზსს ჰქონდა ტექნიკური პრობლემა და შეიცვალა დარბაზი, უბრალოდ ჩვენ პრესსამსახური არ ვიყავით ინფორმირებული, თორემ რა არის ამასი დასამალი. საქმის კურსში არ ვართ. მოსამართლემ გააგრძელა სხვა პროცესი და ავტომატურად ინფორმაციას ვერ ვიგებ. სანამ პირველწყაროდან ინფორმაციას არ მივიღებ, შესაბამისად ვერ გავცემ. გირაო იყო, საპროცესო იყო, თუ რა მოქმედება იყო, ამ ეტაპზე არვიცი",-განუცხადეს "ექსპრესნიუსს" თბილისის საქალაქო სასამართლოს პრესსამსახურში.
შეგახსენებთ, კახა მამულაშვილი თბილისის საერთაშორისო აეროპორტში ნარკოტიკული საშუალებების უკანონო შეძენა-შენახვისა და საქართველოში უკანონოდ შემოტანის ბრალდებით დააკავეს.
სამართალდამცველებმა დაკავებულის პირადი ჩხრეკის დროს ხელბარგიდან და პირადი საფულიდან ამოიღეს სხვადასხვა დასახელების ნარკოტიკული საშუალებები, კერძოდ საქმეზე ჩატარებული ქიმიური ექსპერტიზის დასკვნის მიხედვით აღნიშნული ნარკოტიკული საშუალებებია: 5.591 გრ კოკაინი, 1,15 გრ კანაფის ფისი და მდმ ე.წ. „ექსტაზი“ 0,2048 გრ.
კახი მ-ს ნარკოლოგიური შემოწმების შედეგად ნარკოტიკული საშუალება კოკაინის მოხმარების ფაქტი დაუდგინდა.
გამოძიება ნარკოტიკული საშუალებების უკანონო შეძენა-შენახვისა და საქართველოში უკანონოდ შემოტანის ფაქტზე მიმდინარეობს (საქართველოს სსკ-ის 260-ე მუხლის პირველი ნაწილით და სსკ-ის 262-ე მუხლის პირველი ნაწილით).