ლაშა თორდია: ვფიქრობ, რომ მოწმეებზე ზეწოლა განხორციელდება

2017-05-15 13:40:53, 2264 ნახვა

საზოგადოება

სახელმწიფო აუდიტის სამსახურის უფროსი ლაშა თორდია საავადმყოფოდან უკვე გამოწერეს.

როგორც თორდიამ ჟურნალისტებს განუცხადა, ის პროკურატურას უნდობლობას უცხადებს.

"ვფიქრობ, რომ მოწმეებზე ზეწოლა განხორციელდება და იმ ადამიანების დამუშავება მოხდება, რომლებიც მომხდარ ფაქტს დაესწრნენ. რაც შეეხება გამომძიებლების შეკითხვებს, მათ სახლში მივიღებ და გავცემ ყველა კითხვაზე პასუხს", - აღნიშნა ლაშა თორდიამ.

მისივე თქმით, აბსურდულია მის მიმართ წაყენებული ბრალდებები, თითქოს ნასვამ მდგომარეობაში მყოფი ჩხუბის დაწყებას ცდილობდა.

შეგახსენებთ, რომ სახელმწიფო აუდიტის სამსახურის ხელმძღვანელს ლაშა თორდიას 12 მაისს თავს დაესხნენ. ლაშა თორდიას განცხადებით მას თავს ყოფილი მთავარი პროკურორი ოთარ ფარცხალაძე და მასთან ერთად მყოფი რამდენიმე პირი დაესხა. მისივე თქმით, თავდასხმა პირადი ანგარიშსწორების მიზნით განხორციელდა და მის სამსახურებრივ საქმიანობას უკავშირდება. ლაშა თორდიას საქმეზე შსს-მ გამოძიება ძალადობის მუხლით დაიწყო.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან