ვაშაძე - ჩვენ აღარ გვჭირდება დაპირისპირება, გმირები და თეთრ ცხენზე ამხედრებული რაინდები

2016-05-11 22:46:18, 729 ნახვა

პოლიტიკა

"ჩვენ აღარ გვჭირდება დაპირისპირება, გმირები და თეთრ ცხენზე ამხედრებული რაინდები" - ამის შესახებ "ნაციონალური მოძრაობის" ყოფილმა წევრმა გიორგი ვაშაძემ გადაცემა "2030-ში" განაცხადა.

ვაშაძის განცხადებით, მას უცხოეთიდან უამრავი ადამიანი ეხმიანება და ანგარიშების გახსნას თხოვს.

“ჩვენ ძალიან ბევრი დამფინანსებელი გვეყოლება. მეხმიანებიან უცხოეთში მცხოვრები საქართველოს მოქალაქეები და ანგარიშის გახსნას მთხოვენ. ჩვენი პოლიტიკური ძალის სახელწოდება ფეისბუქზე ახლა ირჩევა, რაშიც ათასობით ადამიანია ჩართული. კანდიდატების შერჩევაში ყველა ჩვენი წევრი თუ დამფუძნებელი მიიღებს მონაწილეობას. მაისის ბოლოს დაფუძნების ღონისძიება გვექნება და ყველას მოვუწოდებ, ამ დიდი პროექტის დამფუძნებელი გახდეს”, - განაცხადა ვაშაძემ.

ვაშაძე იქვე აცხადებს, რომ დღეს საქართველოს სრულიად ახალი პერსპექტივა, პოლიტიკაში ახალი თაობა და ენერგია სჭირდება.

“ჩვენ აღარ გვჭირდება დაპირისპირება, გმირები და თეთრ ცხენზე ამხედრებული რაინდები. საქართველოში ხელისუფლებები ერთმანეთს ცვლიდნენ, მაგრამ ახალი ძალა, რომელიც მოდიოდა, ძველს მტერს უწოდებდა. „ქართული ოცნებაც“ ასეთი ბოღმით და შურისძიებით მოვიდა. არ შეიძლება, ყველაფერი შურისძიებაზე და ბოღმაზე დავაფუძნოთ. ჩვენ ძალიან ცოტანი ვართ და გაერთიანება გვჭირდება. უნდა ავირჩიოთ, ერთმანეთს დავუპირისპირდეთ და კიდევ ერთხელ ვიჩხუბოთ თუ გავერთიანდეთ და სრულიად ახალი განვითარება დავიწყოთ”, - განაცხადა გიორგი ვაშაძემ.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან