ბრიტანეთი რუსეთის G7-ში დაბრუნების მცდელობას ვეტოს დაადებს

2020-06-02 00:50:11, 4268 ნახვა

მსოფლიო

გაერთიანებული სამეფოს მთავრობა რუსეთის "დიდ შვიდეულში" ნებისმიერი მიზეზით დაბრუნების მცდელობას ვეტოს დაადებს. ამის შესახებ The Independent წერს. გამოცემა ამ საკითხით მას მერე დაინტერესდა, რაც აშშ-ის პრეზიდენტმა დონალდ ტრამპმა G7-ის ყოველწლიურ შეხვედრაზე რუსეთის პრეზიდენტის დაპატიჟების მზაობა გამოთქვა.
ბრიტანელებმა განაცხადეს, რომ პარტნიორი ქვეყნების უმაღლესი რანგის პოლიტიკოსების სამიტზე დაპატიჟება ტრამპის პრივილეგიაა, რადგან ის ამ წელს მასპინძლის როლით სარგებლობს.
შაბათს აშშ-ის პრეზიდენტმა მედიასთან საუბრის დროს თქვა, რომ "დიდი შვიდეულის" შეხვედრა სექტემბრის თვეში გაიმართება და ის რუსეთის, სამხრეთ კორეის, ავსტრალიისა და ინდოეთის უმაღლესი რანგის სტუმრების ღონისძიებაზე მოწვევისთვის მზადაა.
შეგახსენებთ, რომ რუსეთის ფედერაცია "შვიდეულის" რიგებიდან 2014 წელს, ყირიმის ანექსიის და უკრაინაში ომის გაჩაღების გამო გარიცხეს. აგრესორი ქვეყნის ალიანსში დასაბრუნებლად , G7-ის ყველა წევრი სახელმწიფოს თანხმობაა საჭირო, მაგრამ როგორც ჩანს რუსეთი ვერც ერთ საერთაშორისო ალიანსში კიდევ დიდი ხანი ვერ დაბრუნდება.
საინტერესოა, რომ ამერიკის პრეზიდენტმა სექტემბრის შეხვედრის ხსემების დროს , მისთვის დამახასიათებელი "უტრირების" ილეთი იხმარა და G7-ის ფორმატს პოტენციური "G10 ან G11" უწოდა, რაც ალიანსის გაფართოების "სპოილერად" უნდა იქნას აღქმული.
ტრამპის გადმოსახედიდან G7-ის ფორმატი, რომელშიც ამერიკის გარდა კანადა, იაპონია, გერმანია, იტალია, გაერთიანებული სამეფო და საფრანგეთი შედიან, "ძალიან ძველია" და ახალი ქვეყნების ჩამატრება ეს ალიანსი "კარგ ჯგუფად" ჩამოაყალიბებდა.
ბორის ჯონსონის თქმით, გაერთიანებული სამეფო რუსეთის G7-ში დაბრუნებას არ მიესალმება, მეტიც ასეთი ინიციატივის შემთხვევაში, ალიანსის წევრი ქვეყანა ვეტოს უფლებას გამოიყენებს.
"G7-ის ბოლო სესიებზე მასპინძელმა ქვეყანამ ისეთი ქვეყნების ლიდერები დაპატიჟა, რომლებიც ალიანსში არ შედიან, ეს მასპინძელი ქვეყნის პრეროგატივა და მიღებული პრინციპია",-თქვა ბორის ჯონსონმა ჟურნალისტებთან საუბრის დროს.