მეჭიაური: ზოგიერთი პარტია მემორანდუმებითაც შეეცდება, საბოლოო შედეგზე ზეგავლენა მოახდინოს

2016-09-21 17:15:41, 708 ნახვა

პოლიტიკა

მე მოვაწერ ყველა მემორანდუმს ხელს, რომელიც თუნდაც ელემენტარულად გააუმჯობესებს საარჩევნო გარემოს, - ამის შესახებ პარტია "თამაზ მეჭიაური - ერთიანი საქართველოსთვის" ლიდერმა, თამაზ მეჭიაურმა "ექსპრესნიუსს" განუცხადა.

მეჭიაურის თქმით, მმართველ გუნდს ე.წ მშვიდობის მემორანდუმის არარსებობა ხელს უშლის.

"სახელისუფლებო პარტიას აქვს უამრავი ბერკეტი, ყოველგვარი მემორანდუმების გარეშე არ გააუარესოს საარჩევნო გარემო. ის ცუდი კანონმდებლობაც კი, რომელიც ისედაც არათანაბარ პირობებში აყენებს საარჩევნო სუბიექტებს, თუ არ გააუარესებს, ასე თუ ისე ასატანი გახდება. ხშირ შემთხვევაში იგივე სახელისუფლებო შტოების ზოგიერთი წარმომადგენელი მემორანდუმების გარეშეც და მემორანდუმებითაც შეეცდებიან საბოლოო შედეგზე ზეგავლენა მოახდინონ. ეს არის აღსაკვეთი და არა მემორანდუმები, მაგრამ აღნიშნულ მემორანდუმს მაინც მოვაწერ ხელს. ხელს არ შევუსლი ხელისუფლებას, იმაში, რომ არჩევნები ობიექტურად ჩაატაროს", - განაცხადა მეჭიაურმა.

რაც შეეხება "ნაციონალური მოძრაობის" განცხადებას აღნიშნულ მემორანდუმთან დაკავშირებით, თამაზ მეჭიაურის შეფასებით, "ენმ"-ის მიერ ჩატარებული არჩევნები „ახლოსაც ვერ მივა, თუნდაც დღევანდელ არაობიექტურ, არაკონკურენტუნარიან არჩევნებთან“.

"დღეს არის არაკონკურენტუნარიანი არჩევნები, მაგრამ ეს გარემოც კი 100-ჯერ უფრო ობიექტურია იმასთან შედარებით, რაც იყო "ნაციონალური მოძრაობის" დროს. მათი მხრიდან მემორანდუმის ნეგატიური შეფასებები უადგილოა", - აღნიშნა მეჭიაურმა.

ცნობისთვის, "ექსპრესნიუსთან" საუბრისას "ნაციონალური მოძრაობის" ერთ-ერთმა ლიდერმა, გიგი წერეთელმა განაცხადა, რომ ე.წ მშვიდობის მემორანდუმს რაიმე ფასეულობა არ გააჩნია და ის მხოლოდ ფასადური ნაბიჯია, რომ საზოგადოებას დაანახონ, თითქოს ხელისუფლებას მშვიდობა სურს.

შეგახსენებთ, „ქართულმა ოცნებამ“ ე.წ. მშვიდობის მემორანდუმი გაასაჯაროვა:

„ჩვენ, ქვემორე ხელმომწერი 2016 წლის 8 ოქტომბრის საპარლამენტო არჩევნების მონაწილე საარჩევნო სუბიექტები, ვაცნობიერებთ რა, რომ არჩევნების მშვიდობიანად ჩატარება არის საქართველოში დემოკრატიის განვითარებისა და პოლიტიკური სისტემის კონსოლიდაციის აუცილებელი პირობა, ვაცნობიერებთ რა, რომ საარჩევნო სუბიექტის მიერ სხვა საარჩევნო სუბიექტის წინააღმდეგ კონტრაქციის მოწყობა ქმნის ძალადობის პროვოცირების განსაკუთრებულ საფრთხეს, ვთანხმდებით, რომ უზრუნველვყოფთ ჩვენი აქტივისტების დისტანცირებას სხვა საარჩევნო სუბიექტის მიერ ან მის მხარდასაჭერად გამართული აქციისგან, შეხვედრისგან ან სხვა მსგავსი სახის ღონისძიებისგან და მივიღებთ ყველა ზომას, რათა არ დავუშვათ ჩვენი აქტივისტების მიერ სხვა საარჩევნო სუბიექტის მიერ გამართული ღონისძიების ხელშეშლა. წინამდებარე შეთანხმება ვრცელდება მთელ საარჩევნო პერიოდზე, არჩევნების საბოლოო შემაჯამებელი ოქმის გამოქვეყნებამდე“, - ნათქვამია მემორანდუმში.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან