პირი, რომელმაც ბათუმის უმაღლესი საბჭოს წევრს ნაგავი მიაყარა დააკავეს

2021-01-24 18:28:21, 707 ნახვა

სამართალი

დაკავებულია პირი, რომელმაც აჭარის უმაღლესი საბჭოს წევრს, ირაკლი ჩავლეიშვილს შეურაცხყოფა მიაყენა, - ამის შესახებ ინფორმაციას, თვითონ ორგანიზაცია საკუთარ "ფეისბუქ" გვერდზე ავრცელებს.

სოციალურ ქსელში გამოქვეყნებულია ვიდეომასალა, რომლიდანაც ირკვევა, რომ არასამთავრობო ორგანიზაცია "ალტერნატივას" წარმომადგენელი ირაკლი ფანგანი პოლიციამ ცოტა ხნის წინ, ბათუმში აიყვანა.

როგორც შსს-ში აცხადებენ ჩატარებული ოპერატიულ-საგამოძიებო მოქმედებების შედეგად, 23 იანვარს ბათუმში მომხდარ ინციდენტთან დაკავშირებით, 1991 წელს დაბადებული ი.ფ., მოსამართლის განჩინების საფუძველზე, დევნის ბრალდებით დააკავეს.

შეგახსენებთ, რომ ბათუმში მომხდარ ინციდენტზე შინაგან საქმეთა სამინისტრომ გამოძიება ორი მუხლით დაიწყო და ეს მუხლებია: 156-ე - დევნა და 239-ე - ხულიგნობა.

მანამდე აჭარის უმაღლესი საბჭოს წევრი, ირაკლი ჩავლეიშვილი დღის პირველ ნახევარში გამოკითხვაზე იმყოფებოდა. მან გამოძიების კითხვებს უპასუხა და მას სავარაუდოდ, დაზარალებულის სტატუსს მიანიჭებენ.

შეგახსენებთ, რომ ირაკლი ჩავლეიშვილს, რომელმაც ბოიკოტზე უარი თქვა და აჭარის უმაღლეს საბჭოში შევიდა, არასამთავრობო ორგანიზაცია "ალტერნატივას" წევრმა შეურაცხყოფა მიაყენა, რა დროსაც მას ნაგავი მიაყარა.

ინციდენტი იმ დროს მოხდა, როდესაც რამდენიმე ორგანიზაცია ბათუმის ბულვარში მშენებლობას აპროტესტებდა, ამავე აქციაზე იყო ირაკლი ჩავლეიშვილიც.

მნიშვნელოვანია ის ფაქტი, რომ დღეს ამ არასამთავრობოების ნაწილი "ალტერნატივას" წევრის ქმედებას გაემიჯნა.