იუსტიციის სასწავლო ცენტრის განახლებულ სერვისებს სახელმწიფო უწყებებისა და კერძო სექტორის წარმომადგენლები გაეცნენ

2015-02-23 11:15:41, 757 ნახვა

საზოგადოება

საქართველოს იუსტიციის სასწავლო ცენტრმა სახელმწიფო უწყებებსა და კერძო სექტორს განახლებული სერვისები შესთავაზა.

პრეზენტაცია საქართველოს იუსტიციის სასწავლო ცენტრის ყვარლის კომპლექსში გაიმართა.

ცენტრის ინფორმაციით, სიახლე საჯარო და კერძო სექტორში ეფექტიანი მართვისა და მომხმარებლის ინტერესებზე ორიენტირებული მომსახურების სტანდარტის გაუმჯობესებას ითვალისწინებს.

პრეზენტაციის ფარგლებში განხილულ იქნა იურიდიული, სოციალური, ფინანსური, ინფორმაციული ტექნოლოგიებისა და ტესტირების მიმართულებით ცენტრში არსებული სიახლეები.

მიწვეულ სტუმრებს ვიდეორგოლის სახით ახალი პროდუქტი „წარმატების ფორმულა“ წარედგინათ.

ცენტრის დირექტორ ნუგზარ კაკულიას განცხადებით, ახალი პროდუქტი ნებისმიერი ორგანიზაციისთვის არის კონკრეტულ შედეგებზე ორიენტირებული კომპლექსური შეთავაზება.

ფორმულა სამ ეტაპად იყოფა: „პირველ ეტაპზე განხორციელდება ორგანიზაციის თანამშრომელთა წინასწარი შეფასება; მეორე ეტაპზე გამოვლენილი საჭიროებების გათვალისწინებით დაიგეგმება და განხორციელდება უშუალოდ პრობლემაზე ორიენტირებული სწავლება; მესამე, დასკვნით ეტაპზე კი, შეფასდება სწავლების შედეგები, რა დონეზე მოხდა თანამშრომელთა ცოდნის − უნარებისა და დამოკიდებულებების გაუმჯობესება“.

საქართველოს იუსტიციის სასწავლო ცენტრის განახლებული, კომპლექსური შეთავაზება ორგანიზაციული განვითარებისთვის უნიკალური შესაძლებლობაა.

ღონისძიებას სახელმწიფო უწყებების ხელმძღვანელი პირები, მსხვილი ფინანსური ინსტიტუტებისა და საერთაშორისო დონორი ორგანიზაციების წარმომადგენლები დაესწრნენ.