საერთაშორისო რესპუბლიკური ინსტიტუტის გამოკითხვის მიხედვით, უკანასკნელი 12 თვის განმავლობაში საქართველოში საჭირო მომსახურებისა და გადაწყვეტილების მიღებისათვის ქრთამის მიცემის შესახებ მოქალაქეთა რეკორდულად მცირე, მხოლოდ 0,1% საუბრობს.

გამოკითხულთა 98% აცხადებს, რომ ქრთამი არ მიუცია, კითხვაზე პასუხი არ აქვს 2%-ს, 1% კი პასუხის გაცემისაგან თავს იკავებს.

„IRI“-ს შარშანდელი კვლევის მიხედვით, იმ მოქალაქეთა რაოდენობა, ვინც  ქრთამის მიცემას ადასტურებდა, 0,4% იყო.

საქართველოში კორუფციასთან ბრძოლის კოორდინაციას ანტიკორუფციული საბჭო ახორციელებს, რომელსაც იუსტიციის მინისტრი თეა წულუკიანი ხელმძღვანელობს.

იუსტიციის სამინისტროს ინფორმაციით, ფუნდამენტური ანტიკორუფციული რეფორმების შედეგად დღეს საქართველო ევროპის ქვეყნებს შორის კორუფციის ერთ-ერთი ყველაზე დაბალი მაჩვენებლით გამოირჩევა, ხოლო ანტიკორუფციული პოლიტიკის თვალსაჩინო წარმატება არაერთი საერთაშორისო კვლევით არის დადასტურებული.

„მიღწეული შედეგების გათვალისწინებით, საქართველო კორუფციის წინააღმდეგ ბრძოლის ახალ, კიდევ უფრო თანამედროვე ეტაპზე გადავიდა − ისევე, როგორც ევროპის სხვა დემოკრატიული სახელმწიფოებისათვის, საქართველოსთვისაც მთავარი ორიენტირია გამჭვირვალობისა და ანგარიშვალდებულების მაღალი დონის მიღწევა, ინფორმაციის ხელმისაწვდომობისა და მოქალაქეთა ჩართულობის კიდევ მეტად გაზრდა, კორუფციის პრევენციის მექანიზმების კიდევ უფრო დახვეწა და სახელმწიფო მმართველობაში ტექნოლოგიებისა და ინოვაციების კიდევ უფრო მაღალი ხარისხით გამოყენება.

საქართველოს მთავრობის პოლიტიკური კურსი და ხედვა აისახა განახლებულ ანტიკორუფციულ სტრატეგიასა და ახალ სამოქმედო გეგმაში, რომელიც კორუფციის წინააღმდეგ ბრძოლის უწყებათაშორისი საკოორდინაციო საბჭოს 2015 წლის 4 თებერვლის სხდომაზე დამტკიცდა. განახლებული ანტიკორუფციული სტრატეგია და ახალი სამოქმედო გეგმა კორუფციის პრევენციისა და კორუფციის წინააღმდეგ ბრძოლის პროცესში იდენტიფიცირებული გამოწვევების ეფექტიანი გადაჭრისა და კორუფციული რისკების შემცირებისაკენ არის მიმართული. ის ეფუძნება საუკეთესო საერთაშორისო გამოცდილებას, საერთაშორისო ორგანიზაციების რეკომენდაციებს (OECD, GRECO, UNODC), წინა სტრატეგიული დოკუმენტების შესრულების შეფასებასა და არასამთავრობო/საერთაშორისო ორგანიზაციების კვლევების ანალიზს. დოკუმენტი ასახავს კორუფციის წინააღმდეგ ბრძოლის კუთხით არსებული გამოწვევებისა და რისკების ანალიზსა და შეფასებას თითოეულ რელევანტურ სფეროში და 13 ძირითადი პრიორიტეტის ფარგლებში მათი გადაჭრის ეფექტიან საშუალებებს  გვთავაზობს.

ანტიკორუფციული ბრძოლის წარმატება კორუფციული დანაშაულის პროაქტიულ გამოძიებასაც ეფუძნება. გასულ 2014 წელს კორუფციულ დანაშაულებთან დაკავშირებული სისხლის სამართლის  401 საქმიდან 151 საქმეზე გამოძიება დაწყებულია დაზარალებულისგან ან სხვა წყაროდან მიღებული ინფორმაციის საფუძველზე, ხოლო 242 საქმეზე (60%) გამოძიება სამართალდამცავი ორგანოების მიერ  პროაქტიულად დაიწყო“, - ნათქვამია იუსტიციის სამინისტროს განცხადებაში.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

ზელენსკიმ ტრამპთან საუბრის დეტალები გაამხილა

ვუჩიჩი გადადგომამდე თბილისში ჩამოვა

ესაა სახელმწიფოს პოლიტიკა, რაზეც პასუხისმგებლობა ივანიშვილსა და ოცნებას ეკისრებათ - TI წამებაზე

საია - გავრცელებული შემაშფოთებელი კადრები სისტემური და სისტემატური საპოლიციო ძალადობის კიდევ ერთ ილუსტრაციას წარმოადგენს, რომელიც წლების განმავლობაში ავტორიტარული რეჟიმის ხელწერად იქცა