კობახიძე ოპოზიციაზე - ე.წ. გერმანული მოდელი მათაც არ აწყობთ, უბრალოდ რაღაც მოთხოვნა უნდა დაეყენებინათ და სხვა ვერ მოიფიქრეს

2019-11-16 14:18:08, 2367 ნახვა

კომენტარი

„ვფიქრობ, უფრო მეტად სპეკულაციურია ოპოზიციის მოთხოვნა. მგონია, რომ საარჩევნო სისტემის ე.წ. გერმანული მოდელი მათაც არ აწყობთ, უბრალოდ რაღაც მოთხოვნა უნდა დაეყენებინათ და სხვა ვერ მოიფიქრეს“, - ამის შესახებ „ქართული ოცნების“ აღმასრულებელმა მდივანმა ირაკლი კობახიძემ პარტიის ოფისში გამართული შეხვედრის შემდეგ განაცხადა.

როგორც მან აღნიშნა, გერმანულ მოდელზე მსჯელობა სამართლებრივი მიზეზით შეუძლებელია, რადგან ქვეყნის კონსტიტუციასთან თავსებადი არ არის.

„რაც შეეხება ე.წ. გერმანულ მოდელს, ამაზე 2016 წელსაც იყო საუბარი. ეს მოდელი არ არის თავსებადი იმ კონსტიტუციურ მოცემულობასთან, რაც არის ჩამოყალიბებული. აქედან გამომდინარე, ამაზე მსჯელობა შეუძლებელია სამართლებრივი მიზეზით. რაც შეეხება პოლიტიკურ პარტიებს, მათ მოვუწოდებ, რომ მოემზადონ 2020 წლის საპარლამენტო არჩევნებისთვის.

რიგგარეშე იქნება არჩევნები თუ არ იქნება, ნებისმიერი შემთხვევაში შედეგის კუთხით ჩვენთვის პოლიტიკური მოცემულობა არ იცვლება. ერთ შეთხვევაშიც და მეორეშიც დამაჯერებლად მოვიგებთ არჩევნებს. ჩვენთვის პოლიტიკური განსხვავება ამ კუთხით არ არსებობს. ვფიქრობ, უფრო მეტად სპეკულაციურია ეს მოთხოვნა, მათაც არ აწყობთ, უბრალოდ რაღაც მოთხოვნა უნდა დაეყენებინათ და სხვა ვერ მოიფიქრეს. ჯერ იყო საუბარი რიგგარეშე არჩევნებზე, რომელიც ჩვენთვის არაფერს არ ცვლის და ეხლა საუბარია გერმანულ მოდელზე, რომელიც არ არის თავსებადი კონსტიტუციასთან“, - განაცხადა ირაკლი კობახიძემ.

შეგახსენებთ, ოპოზიციამ თავდაპირველად გარდამავალი მთავრობის მიერ პროპორციული საარჩევნო სისტემით ვადამდელი არჩევნების ტარება მოითხოვა. გუშინ გამართული კონსულტაციების შემდეგ კი, ოპოზიციის ლიდერებმა განაცხადეს, რომ არჩევნები ე.წ. გერმანული მოდელით უნდა ჩატარდეს, რომელიც მათი მტკიცებით, არსებული ვითარების გამოსასწორებლად ყველაზე მოკლე გზაა.