შინაგან საქმეთა მინისტრის მოადგილე ნათია მეზვრიშვილი პოეტ ზვიად რატიანთან დაკავშირებით კიდევ ერთ განმარტებას აკეთებს.

როგორც მან "TV პირველის" ეთერში განაცხადა, პოლიციელისთვის შეურაცხყოფის მიყენება,  მის მიერ სამსახურებრივი უფლებამოსილების გადამეტებას არ ამართლებს და შსს აღნიშნულის თაობაზე არც მიანიშნებს.

მეზვრიშვილის განმარტებით,  საუბარია იმაზე, რომ ზვიად რატიანისთვის პოლიციელების მხრიდან  ფიზიკური შეურაცხყოფის მიყენების დადასტურების შემთხვევაში,  შინაგან საქმეთა სამინისტროს რეაგირება უმკაცრესი იქნება:

„მინდა საზოგადოებამ ძალიან სწორად გაიგოს რაზე ვსაუბრობთ – ჩვენ არ ვსაუბრობთ იმაზე, რომ როცა პოლიციას შეურაცხყოფას აყენებენ, ეს ამართლებს რაიმე ფორმით პოლიციელის მხრიდან სამსახურებრივი უფლებამოსილების გადამეტებას და ამაზე საუბარი არ არის, ჩვენ ვსაუბრობთ , რომ თუკი გამოძიების ფარგლებში, რომ პოლიციელებმა გადაამეტეს უფლებამოსილებას, მათ ფიზიკური შეურაცხყოფა მიაყენეს ზვიად რატიანს, შინაგან საქმეთა სამინისტროს მიდგომა იქნება ძალიან მკაცრი. მოგეხსებნებათ, საქმეს იძიებს საქართველოს მთავარი პროკურატურა“,-აცხადებს ნათია მეზვრიშვილი.

მეზვრიშვილის თქმით,  მეტი ობიექტურობისთვის საქმე გამოსაძიებლად პროკურატურას გადაეცა:

„საზოგადოებას უნდა ესმოდეს, რომ როდესაც საუბარია სისხლის სამართლის დანაშაულის ნიშნებზე, ეს უკვე პროკურატურის კომპეტენციაა. ამიტომ იძიებს პროკურატურა ამ საქმეს.

ჩვენ არ გვინდა, რომ გაჩნდეს გარკვეული კითხის ნიშნები, ამიტომ, მაქსიმალური ობიექტურობისათვის, საქმეს იძიებს პროკურატურა და ასეთია კანონის მოთხოვნაც. ჩვენ დაველოდებით გამოძიების შედეგებს და თუ დადასტურდა პოლიციელების მხრიდან გადაცდომის ჩადენის ფაქტები, ამაზე შესაბამისი სამართლებრივი რეაგირებას მოვახდენთ.- მათ წარედგინებათ ბრალი. ეს არის სამართლებრივი რეაგირების კანონით დადგენილი ფორმა და თუ დადასტურდა მათი დამნაშავეობა, სასამართლო იმსჯელებს ამ საკითხზე, ისე როგორც კანონით არის განსაზღვრული“,-განაცხადა ნათია მეზვრიშვილმა.

ზვიად რატიანი საპოლიციო კონტროლისას დააკავეს. რატიანი ამბობს, რომ სამართალდამცველებმა დაკავებისას უფლებამოსილებას გადააჭარბებს. ის პოლიციელებს ფიზიკურ შეურაცხყოფაში ადანაშაულებს.

თბილისის პროკურატურის საგამოძიებო ნაწილში დაიწყო გამოძიება საქართველოს შინაგან საქმეთა სამინისტროს ცალკეული თანამშრომლების მხრიდან მოქალაქე ზვიად რატიანის მიმართ სამსახურებრივი უფლებამოსილების შესაძლო ძალადობით გადამეტების ფაქტზე.

შს მინისტრის მოადგილე  ნათია მეზვრიშვილმა გუშინ განაცხადა, რომ ზვიად რატიანი იყო ნასვამ მდგომარეობაში, ვერ აკონტროლებდა ქცევას და ლექსიკას, იქცეოდა აგრესიულად, წინააღმდეგობას უწევდა და შეურაცხყოფას აყენებდა სამართალდამცველებს, რითაც მათ არ აძლევდა სამსახურებრივი მოვალეობის შესრულების შესაძლებლობას.

ავტორი: ,

სოციალური ქსელები

გვარამია ენმ-ზე - ხალხი ერთ პარტიაშია და ბრიფინგებით, სატელევიზიო ეთერებით და სტატუსებით ელაპარაკება ერთმანეთს და წყევლის და აგინებს

მოქალაქეების 71% მხარს უჭერს ქვეყნის ევროკავშირში გაწევრიანებას, თუმცა 49% მიიჩნევს, რომ საქართველო ევროინტეგრაციის პროცესში არასწორი მიმართულებით მიდის

ლელო: სააკაშვილის განცხადება პოლიტიკური განხეთქილების შექმნის მცდელობაა

ნავროცკიმ ზელენსკის მიმართა „თეთრი არწივის“ სკანდალის ფონზე