საქართველოს შინაგან საქმეთა მინისტრმა, გიორგი მღებრიშვილმა და ნატო-ს გაერთიანებული საზღვაო ძალების (MARCOM) სარდლის მოადგილემ, ვიცე-ადმირალმა ერვი ბლეჟონმა ნატო-საქართველოს საზღვაო თანამშრომლობის საკითხები მედიის წარმომადგენლებთან შეაჯამეს.

ერთობლივი პრესკონფერენცია გიორგი მღებრიშვილმა გახსნა. შს მინისტრმა საქართველოში ბულგარეთის საელჩოს და ნატო-ს სამეკავშირეო ოფისს ნატო-ს საპორტო ვიზიტის ორგანიზებაში შეტანილი წვლილისთვის მადლობა გადაუხადა. გიორგი მღებრიშვილმა ყურადღება გაამახვილა შავი ზღვის უსაფრთხოების საკითხებში საქართველოს შინაგან საქმეთა სამინისტროს სასაზღვრო პოლიციის სანაპირო დაცვის მნიშვნელობაზე.

„დღეს მნიშვნელოვანი დღეა, რადგან მაქვს პატივი, ვუმასპინძლო ნატო-ს საზღვაო ძალების სარდლობას და ალიანსის მუდმივმოქმედ ნაღმსაწინააღმდეგო საზღვაო შენაერთს. მინდა, მადლობა გადავუხადო ვიცე-ადმირალ ერვე ბლეჟონს იმისთვის, რომ დღეს ჩვენს გვერდითაა. მისი სტუმრობა ალიანსის მხრიდან საქართველოს მხარდაჭერის უდავო დასტურია. აღსანიშნავია ის ფაქტი, რომ ეს გახლავთ ნატო-ს საზღვაო შენაერთის მესამე ვიზიტი საქართველოში, რაც ჩვენი მჭიდრო თანამშრომლობის მკაფიო მაგალითია.

მოგეხსენებათ, ქვეყნის საზღვაო უსაფრთხოებასა და ზღვაზე სამართალდაცვითი საქმიანობის განხორციელებაზე პასუხისმგებელი, წამყვანი უწყება გახლავთ შსს-ს სასაზღვრო პოლიცია. ამდენად, ჩვენ განსაკუთრებულ ყურადღებას ვუთმობთ სანაპირო დაცვის შესაძლებლობების განვითარებას. ამ მიმართულებით არაერთ სიახლეს ვნერგავთ, მათ შორისაა, ერთიანი საზღვაო სურათის შექმნა და უწყებათშორისი თანამშრომლობის მექანიზმების გაძლიერება. ამ კუთხით, აღსანიშნავია შსს-ს ერთობლივი საზღვაო ოპერაციების მართვის ცენტრი, რომლის შემდგომი განვითარება ჩვენთვის უაღრესად მნიშვნელოვანია. აქტიურად მიმდინარეობს სანაპირო დაცვის ფლოტის მოდერნიზების პროცესიც.

ევროატლანტიკური ინტეგრაცია ჩვენი ქვეყნის საგარეო პოლიტიკის უმთავრესი პრიორიტეტია. ჩვენ ძალისხმევას არ ვიშურებთ იმისთვის, რომ განვავითაროთ ჩვენი შესაძლებლობები ნატო-ს სტანდარტების შესაბამისად და უზრუნველვყოთ ალიანსთან ურთიერთთავსებადობა“,- განაცხადა შს მინისტრმა.

პრესკონფერენციაზე მედიის წარმომადგენლების შეკითხვებს ნატო-ს გაერთიანებული საზღვაო ძალების (MARCOM) სარდლის მოადგილემ, ვიცე-ადმირალმა ერვი ბლეჟონმა, საქართველოში ნატო-ს სამეკავშირეო ოფისის უფროსის მოადგილე როსარია პუგლისმა და ნატო-ს ნაღმსაწინააღმდეგო შენაერთის მეთაურმა, II რანგის კაპიტანმა, ჯასთინ ჰეინისმა უპასუხეს.

ერთობლივ პრესკონფერენციამდე ნატო-ს გაერთიანებული საზღვაო ძალების სარდლის მოადგილემ შს მინისტრს საქართველოს ტერიტორიულ წყლებში საპორტო ვიზიტით მყოფი, ნატო-ს მუდმივმოქმედი მეორე ნაღმსაწინააღმდეგო შენაერთის (SNMCMG2) გემების მეთაურები წარუდგინა და საფლაგმანო ხომალდზე - „REGELE FERDINAND“ უმასპინძლა.

ნატო-ს მუდმივმოქმედი მეორე ნაღმსაწინააღმდეგო შენაერთის (SNMCMG2) ხომალდები ბათუმის ნავსადგურში 6 ნოემბრამდე დარჩებიან და ქართული მხარის მიერ ორგანიზებულ, სხვადასხვა ერთობლივ სწავლებასა და საჩვენებელ წვრთნებში მიიღებენ მონაწილეობას.

(NS)

ავტორი: ,

სოციალური ქსელები

ყირიმში, ნავთობბაზისა და ბორნის დაბომბვის შემდეგ, მათ შეწყვიტეს საწვავის გაყიდვა და დახურეს ქერჩის გადასასვლელი

აფხაზეთის საოკუპაციო რეჟიმი - თბილისიდან მშვიდობა მხოლოდ ძალის გამოუყენებლობის შესახებ შეთანხმებაა

ალბანეთში ათიათასობით ადამიანმა კუშნერ-ივანკა ტრამპთან დაკავშირებული კურორტის წინააღმდეგ საპროტესტო აქცია გამართა

მოვითხოვთ, 4 ოქტომბრის საქმის საფუძვლიან და ობიექტურ გადახედვას - მეცნიერებათა აკადემია