ანგელა მერკელმა გერმანიაში ფარანჯისა და ნიქაბის ტარების აკრძალვას მხარი დაუჭირა

2016-12-07 12:18:29, 2361 ნახვა

მსოფლიო

გერმანიის კანცლერმა ანგელა მერკელმა ქვეყანაში ფარანჯისა და ნიქაბის ტარების აკრძალვას მხარი დაუჭირა, - ამის შესახებ BBC იუწყება.

მედია საშუალების ინფორმაციით, ქალაქ ესენში "ქრისტიანულ-დემოკრატიული კავშირის" ყრილობაზე სიტყვით გამოსვლისას მერკელმა აღნიშნა, რომ ამგვარი მუსლიმური ტანსაცმლის ტარება ყველგან უნდა აიკრძალოს, სადაც ეს სამართლებრივი თვალსაზრისითაა შესაძლებელი.

"ეს ჩვენი არ არის", - განაცხადა მერკელმა.

მანვე განმარტა, რომ გერმანიაში ადამიანებს შორის კომუნიკაციის დროს სახის ჩვენებაა მიღებული.

"ამიტომ ჩვენთან არ არის მიღებული ისეთი ტანსაცმლის ტარება, რომელიც სახესა და სხეულს ფარავს", - განაცხადა კანცლერმა.

მისივე თქმით, ფარანჯის ტარება უნდა აიკრძალოს სკოლებში, სასამართლო შენობებში და სხვა სახელმწიფო დაწესებულებებში.

ანგელა მერკელმა ასევე გაიხსენა თავისი ვალდებულებები, არ დაუშვას ქვეყანში 2015 წლის შემოდგომას შექმნილი ვითარების გამეორება, როდესაც გერმანიაში ასობით ათასი არალეგალი მიგრანტი ჩავიდა.

"ეს იყო და რჩება ჩემს პოლიტიკურ ამოცანად. ამ საკითხზე ჩვენ მრავალი თვის განმავლობაში ვმუშაობთ", - განაცხადა მერკელმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან