პრემიერი ავსტრიის რესპუბლიკის ეროვნული საბჭოს მეორე პრეზიდენტ კარლჰაინც კოპფას შეხვდა

2016-07-14 16:32:16, 541 ნახვა

პოლიტიკა

საქართველო– ავსტრიის ურთიერთობების ძირითადი საკითხები და თანამშრომლობის გაფართოების პერსპექტივები განიხილეს საქართველოს პრემიერ–მინისტრმა გიორგი კვირიკაშვილმა და ავსტრიის რესპუბლიკის ეროვნული საბჭოს მეორე პრეზიდენტმა კარლჰაინც კოპფმა დღეს გამართულ შეხვედრაზე.

როგორც "ექსპრესნიუსს" მთავრობის ადმინისტრაციიდან აცნობეს, საუბარი შეეხო ორ ქვეყანას შორის სხვადასხვა სფეროში თანამშრომლობის კუთხით არსებულ დიდ პოტენციალს. ხაზი გაესვა ავსტრიის განვითარების სააგენტოს (ADA) საქმიანობის მნიშვნელობას, რომელიც მოიცავს შემდეგ სფეროებს: ტურიზმი, სოფლის მეურნეობა, ენერგეტიკა, სატყეო მეურნეობა, დეცენტრალიზაციისა და გენდერული თანასწორობის ხელშეწყობა.

მხარეებმა განიხილეს საქართველოს საინვესტიციო შესაძლებლობები. აღინიშნა, რომ საქართველო განიხილება როგორც უსაფრთხო, სანდო პარტნიორი, რაც იძლევა ეკონომიკური თანამშრომლობის განვითარების პერსპექტივას. გამოთქვა იმედი, რომ 2016 წელს თბილისში ავსტრიის რესპუბლიკის საელჩოს გახსნა კიდევ უფრო ძლიერ იმპულსს შესძენს ქართულ-ავსტრიულ ორმხრივ ურთიერთობებს.

მხარეებმა ისაუბრეს საქართველოს ევროიტეგრაციის დღის წესრიგზე და სავიზო ლიბერალიზაციის სამოქმედო გეგმის ფარგლებში მიღწეულ პროგრესზე.

ავტრიის რესპუბლიკის ეროვნული საბჭოს მეორე პრეზიდენტმა კიდევ ერთხელ გამოხატა ავსტრიის მტკიცე მხარდაჭერა საქართველოს ევროინტეგრაციის პროცესებისადმი. მანვე ხაზი გაუსვა საქართველოს დამოუკიდებლობის აღდგენის 25 წლისთავის თარიღს და აღნიშნა, რომ ავსტრია იყო ერთ-ერთი პირველი ქვეყანა, რომელმაც საქართველოს დამოუკიდებლობა აღიარა.
მხარეებმა ისაუბრეს საერთაშორისო უსაფრთხოების საკითხებზე და საქართველოს ოკუპირებულ ტერიტორიებზე შექმნილ ვითარებაზე.

საქართველოს პრემიერ-მინისტრმა მადლობა გადაუხადა კარლჰაინც კოპფს საქართველოს ტერიტორიულ მთლიანობისა და ოკუპირებული ტერიტორიების არაღიარების საკითხში ავსტრიის მხარდაჭერისთვის.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან