საქართველოში გიორგი დგებუაძის, იგივე "მასტერას" ექსტრადიცია განხორციელდა

2016-03-22 09:29:46, 852 ნახვა

სამართალი

კონსტიტუციური უსაფრთხოების დეპარტამენტის ყოფილი მაღალჩინოსანი, შეიარაღებული ძალების გაერთიანებული შტაბის სამხედრო პოლიციის დეპარტამენტის უსაფრთხოებისა და განსაკუთრებულ დავალებათა მთავარი სამმართველოს ყოფილი უფროსი გიორგი დგებუაძე, იგივე "მასტერა" საქართველოში ჩამოიყვანეს.

მისი ექსტრადიცია ჰოლანდიიდან გამთენიისას განხორციელდა. დგებუაძე სასჯელაღსრულების დაწესებულებაშია გადაყვანილი.

როგორც მთავარი პროკურატურის წარმომადგენელმა ამირან გულუაშვილმა აღნიშნა, დგებუაძე ე.წ. ნავთლუღის სპეცოპრაციის სისხლის სამართლის საქმეზეა ბრალდებული.

კერძოდ, მას ბრალად ედება 2006 წლის 12 იანვარს, ნავთლუღის ავტოსადგურის მიმდებარე ტერიტორიაზე ჯგუფურად ჩადენილი სამი ახალგაზრდის განზრახ მკვლელობა. ასევე, სამსახურებრივი უფლებამოსილების ძალადობით გადამეტება.

„იმის გათვალისწინებით, რომ თბილისის საქალაქო სასამართლოს გადაწყვეტილებით, გიორგი დგებუაძის მიმართ აღკვეთის ღონისძიების სახით, დაუსწრებლად შეფარდებულია პატიმრობა, მისი მოთავსება მოხდა შესაბამის პენიტენციურ დაწესებულებაში“, - აღნიშნა გულუაშვილმა.

Patreon P მხარი დაუჭირე "ექსპრესნიუსს" →

ავტორი: ირაკლი მანაგაძე , ექსპრესნიუსის რეპორტიორი 2009 წლიდან