სერბეთში საპროტესტო აქციების მონაწილეებმა მდინარე დუნაიზე მდებარე ერთ-ერთი ხიდი მთელი ღამის განმავლობაში დაბლოკეს. როგორც „ასოშიეითიდ პრესი“ წერს, სერბმა სტუდენტებმა კორუფციის საწინააღმდეგო აქციის ფარგლებში 24 საათით დაბლოკეს ქალაქ ნოვი სადში მდებარე ხიდი.

აქციის მონაწილეებს შეუერთდნენ სერბი ფერმერები, რომლებმაც ხიდთან ახლოს ტრაქტორები დააყენეს. მათი თქმით, ამ გზით ისინი ცდილობდნენ, დაეცვათ სტუდენტები სერბეთის პრეზიდენტის, ალექსანდარ ვუჩიჩის მხარდამჭერთა შესაძლო თავდასხმებისგან.

სერბეთის უნივერსიტეტების სტუდენტები ხელმძღვანელობენ მასობრივ ანტიკორუფციულ მოძრაობას, რომელიც მას შემდეგ აგორდა, რაც პირველ ნოემბერს ნოვი სადის ცენტრალურ სარკინიგზო სადგურში ბეტონის შენობის ჩამონგრევას 15 ადამიანის სიცოცხლე ემსხვერპლა.

აქციის მონაწილეები მიიჩნევენ, რომ ეს შემთხვევა მთავრობაში არსებულმა კორუფციამ და სადგურის სარეკონსტრუქციო სამუშაოების დროს დაუდევრობამ გამოიწვია.

ეს საქმე სერბეთში კანონის უზენაესობის კუთხით არსებული პრობლემებით უკმაყოფილების სიმბოლო გახდა.

აქციები სერბეთში უკვე სამი თვეა, გრძელდება. გასული კვირის დასაწყისში აქციების გამო ქვეყნის პრემიერ-მინისტრი მილოშ ვუჩევიჩი გადადგა.

როგორც „ასოშიეითიდ პრესი“ აღნიშნავს, 2 თებერვალს სერბეთის სახელმწიფო ტელერადიოკომპანია RTS-მა მოულოდნელი გამონაკლისი გააკეთა და პირდაპირი ტრანსლაცია გამართა ნოვი სადში გამართული აქციიდან, რომელშიც ათი ათასობით ადამიანი მონაწილეობდა.

სერბეთის მმართველმა პარტიამ სახელმწიფო ტელერადიოკომპანიის მიერ ხიდების ბლოკირების გაშუქება გააკრიტიკა. პარტიამ განაცხადა, რომ სახელმწიფო ტელევიზიამ თავისი სკანდალური რეპორტაჟებით „დაარღვია ობიექტური და მიუკერძოებელი ჟურნალისტიკის ყველა წესი და ღირებულება“.

ავტორი: ექსპრესნიუსი,

სოციალური ქსელები

ოცნების მეგობარმა ირანის პარლამენტმა უცხოური ჩარევის წინააღმდეგ კანონი დაამტკიცა.

რომელი ბრენდი იმსახურებს ჩემპიონს? - ნინა თიბილაშვილის, ქართველი პარალიმპიელი ჩემპიონის ისტორია

კახეთში ფერმერებმა ატამი ნაგავსაყრელზე გადაყარეს, რადგან მისი გაყიდვა ვერ შეძლეს

უკრაინამ პირველად გამოიყენა ბრიტანული დრონები რუსეთის სიღრმეში საჰაერო დარტყმებისთვის