საქართველოში შეიქმნა „ქართულ-რუსული“ ბიზნესასოციაცია, რომლის ხელმძღვანელიც ბიზნესმენი ზაზა ნიშნიანიძეა. აღნიშნული ინფორმაცია ტელეკომპანია BM.GE-ს თავად ბიზნესმენმა დაუდასტურა. როგორც ნიშნიანიძე აცხადებს, ასოციაციის მთავარი მიზანი იქნება იმ ბიზნესმენების დახმარება, რომლებიც რუსეთში ექსპორტით არიან დაკავებული. ზაზა ნიშნიანიძის ინფორმაციით, ასოციაციის წევრებმა პირველი სამუშაო შეხვედრა უკვე გამართეს. აღსანიშნავია, რომ ამ დროისთვის ასოციაცია ჯერ არ არის დარეგისტრირებული ბიზნესრეესტრში.

„დიახ, ნამდვილად შეიქმნა ბიზნესასოციაცია „ქართულ-რუსული“ და მე მთხოვეს მისი ხელმძღვანელობა. ეს იდეა აბსოლუტურად სპონტანური იყო. როდესაც ჩემს მეგობრებთან ვისაუბრეთ, რომლებიც ქართული პროდუქციის რუსეთში გაყიდვით არიან დაკავებული, წარმოიშვა იდეა, და მთხოვეს ამ ორგანიზაციის ხელმძღვანელობა. დავთანხმდი, რადგან მივიჩნევ, რომ ეს ძალიან მნიშვნელოვანი საკითხია. დაახლოებით 600-700 ათასი საქართველოს მოქალაქეა ამ საქმის უკან. შეხვედრაზე 60-მდე ორგანიზაცია იყო წარმოდგენილი, ძირითადად მეღვინეები, სოფლის მეურნეობის სხვა დარგების წარმომადგენლები – მეხილეობა, მებოსტნეობა და ა.შ. ამ ადამიანებს ყურადღება აკლიათ, რადგან თემა ტაბუდადებულია და ბიზნესი ამ წნეხშია. ახლა შევეცდებით, ინსტიტუციონალურად ამ პროცესს ხელი შევუწყოთ“, – განაცხადა ზაზა ნიშნიანიძემ.

მან ასევე ასოციაციის წევრებზე ისაუბრა და აღნიშნა რომ ძირითადად ასოციაციაში მეღვინეები იქნებიან გაწევრიანებულები.

„როგორც გითხარით, ძირითადად მეღვინეები არიან. შეხვედრაზე 60 კომპანია იყო წარმოდგენილი. შემიძლია დავასახელო რამდენიმე ცნობილი ბიზნესმენი: ბადრი კაკაბაძე, მარად შაიდიევი, ლევან და თემურ ანჩაბაძეები, ჯიმი ჩხაიძე და სხვები. რუსეთის მხრიდანაც არის ინტერესი, ბევრს სურს გაწევრიანება, მაგრამ ჯერ კონკრეტული არაფერი არ გვაქვს“, – დასძინა ბიზნესმენმა.

აღსანიშნავია, რომ ზაზა ნიშნიანიძემ 2025 წლის 17 იანვარს ყველა აქტივი დიმიტრი ნიშნიანიძეზე გადააფორმა.

„არაფერი განსაკუთრებული არ არის ამაში. 10-15 წელია აღარ ვარ აქტიურ ბიზნესში და ვცდილობ, რაც შეიძლება მეტად ჩავრთო შვილები პროცესში. ეს იყო ძირითადი მიზეზი“, – აღნიშნა ზაზა ნიშნიანიძემ.

ავტორი: ექსპრესნიუსი,

სოციალური ქსელები

ტრამპი ირანს „განადგურებით“ დაემუქრა, თუ თეირანი დარტყმებს არ შეწყვეტს

რუსთავის ქალთა ციხესთან, აქტივისტის ნანა სანდერის მხარდამჭერი აქცია მიმდინარეობს

პატრიოტი დანიელი მხარს უჭერს ბულგარეთის წინააღმდეგობას პატრიოტ კირილისთვის სანქციების დაწესების შესახებ

ლევან მაჭავარიანი და არჩილ გორდულაძე ბოდიშს იხდიან პარლამენტში ჩხუბისთვის