კალაძე - არავის მივცემთ უფლებას, საქართველოს მიმართ ბატონყმური დამოკიდებულება ჰქონდეს

2024-12-17 13:36:21, 332 ნახვა

პოლიტიკა

სიმართლეს არ შეესაბამება მოსაზრება, თითქოს ევროპულმა საბჭომ ქართველი მაღალჩინოსნებისთვის დიპლომატიური და სამსახურებრივი პასპორტების შეჩერება იმის გამო გადაწყვიტა, რომ საქართველოს ხელისუფლებამ ევროკავშირში გაწევრიანების პროცესი შეაჩერა,- ამის შესახებ თბილისის მერმა, კახა კალაძემ განაცხადა.

კალაძის განცხადებით, საქართველოს არანაირი ბერკეტი არ გააჩნია და მოლაპარაკებები ევროკავშირმა უნდა გახსნას.

„რაც შეეხება ევროკავშირთან მოლაპარაკებების გახსნა-არგახსნის საკითხს, საქართველოს მთავრობას არანაირი ბერკეტი არ გააჩნია. მოლაპარაკებები უნდა გახსნას ევროკავშირმა. გახსნან, დღესვე ვაწერთ ხელს. არანაირი პრობლემა არ არსებობს ამ მიმართულებით. შანტაჟი კატეგორიულად მიუღებელია, ისევე, როგორც კანდიდატის სტატუსთან იყო. გახსოვთ, როგორ იყენებდნენ ამ ყველაფერს. გვეუბნებოდნენ, ქართველებს გგულშემატკივრობთ, კარგი ხალხი ხართ, მაგრამ ხელისუფლება გყავთ ცუდი. იგივე შანტაჟი გრძელდება დღეს, მოლაპარაკებების გახსნა-არგახსნასთან დაკავშირებით“,- აღნიშნა კალაძემ.

ამასთან, კახა კალაძის თქმით, მიუხედავად იმისა, რომ ევროპული საბჭოს ამ გადაწყვეტილებას 25 ქვეყანა უჭერს მხარს, საქართველოს ხელისუფლება არავის მიცემს უფლებას, ჩვენი ქვეყნის მიმართ ბატონყმური დამოკიდებულება ჰქონდეს.

„არავის მივცემთ იმის უფლებას, რომ ბატონყმური დამოკიდებულება ჰქონდეს ქართველი ხალხისა და საქართველოს მიმართ. არავის მივცემთ იმის უფლებას, რომ იგივე პროცესები განვითარდეს ქვეყანაში, რაც დღეს უკრაინაში ხდება. ცდებით, თუ ფიქრობთ, რომ ქართველ ხალხს რაღაცები ავიწყდება. ამოიღეთ განცხადებები, რომელიც კეთდებოდა მეორე ფრონტთან დაკავშირებით. სანქციებზეც ხომ ამბობდნენ, არავის მოვუწოდებთ სანქციებთან მიერთებასო? ჩაწერეს თუ არა რეზოლუციაში? არც სანქციებს მივუერთდებით და არ ქვეყნის უკრაინიზაცია მოხდება. საქართველოში გვექნება მშვიდობა, სიმშვიდე და ეკონომიკური განვითარება“,- განაცხადა კალაძემ.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),