2022-06-15 14:03:45, 1332 ნახვა

---

პროკურატურამ ძარცვის ორ ეპიზოდზე დაკავებული პირის მიმართ სამკურნალო დაწესებულებაში მოთავსების თაობაზე სასამართლოს მიმართა

საქართველოს პროკურატურამ, ძარცვის ორ ეპიზოდზე დაკავებული პირის მიმართ სისხლისსამართლებრივი დევნის შეწყვეტის და სამკურნალო დაწესებულებაში მოთავსების თაობაზე, სასამართლოს შუამდგომლობით მიმართა. ინფორმაციას ამის შესახებ საქართველოს პროკურატურა ავრცელებს.

მათივე ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ ვაჟა-ფშაველას გამზირის მიმდებარე ტერიტორიაზე, ბრალდებულმა სავაჭრო ჯიხურის მინა შეამსხვრია და აშკარად მართლსაწინააღმდეგოდ ალკოჰოლურ სასმელებს დაეუფლა, რის შემდგომაც დანაშაულის ადგილიდან მიიმალა. დაახლოებით ერთი საათის შემდეგ, ბრალდებულმა მიცკევიჩის ქუჩის მიმდებარედ, მოქალაქეს ჯიბიდან მობილური ტელეფონი გასტაცა და ასევე, შემთხვევის ადგილიდან გაიქცა.

დაკავებულს ბრალდება ძარცვის ორ ეპიზოდზე საქართველოს სისხლის სამართლის კოდექსის 178-ე მუხლის მეორე ნაწილის „ა“ ქვეპუნქტით წარედგინა (ძარცვა, სხვისი მოძრავი ნივთის აშკარა დაუფლება მართლსაწინააღმდეგო მისაკუთრების მიზნით, რამაც მნიშვნელოვანი ზიანი გამოიწვია).

სისხლის სამართლის საქმეზე ბრალდებულს ფსიქიატრიული ექსპერტიზა დაუყოვნებლივ დაენიშნა.

ექსპერტიზის დასკვნის თანახმად, ბრალდებულს შეურაცხადობა დაუდგინდა, რის გამოც იგი ფსიქიატრიულ მკურნალობას საჭიროებს.

აღნიშნულიდან გამომდინარე, ბრალდების მხარემ ბრალდებულის მიმართ სისხლისსამართლებრივი დევნის შეწყვეტის და ფსიქიატრიული მკურნალობის დანიშვნის შუამდგომლობით სასამართლოს მიმართა.

---

ავტორი: NS (სტატია დაფინანსებულია),

---

დღის თემა

მთავარი თემა

ინტერვიუ - ექსკლუზივი