სტოლტენბერგი: ნატო-საქართველოს საწვრთნელი ცენტრი არავის წინააღმდეგ არ არის მიმართული

2015-08-27 18:42:53, 598 ნახვა

პოლიტიკა

ნატო-ს გენერალური მდივნის იენს სტოლტენბერგის განცხადებით, ნატო-საქართველოს წვრთნისა და შეფასების ცენტრი არავის წინააღმდეგ არ არის მიმართული.
ამის შესახებ სტოლტენბერგმა საქართველოს პრეზიდენტთან ერთობლივ პრესკონფერენციაზე განაცხადა.
სტოლტენბერგის თქმით, აღნიშნული ცენტრის გახსნა მნიშვნელოვანი, წინ გადადგმული ნაბიჯია.
„ჩვენ გავხსენით ნატო-საქართველოს ერთობლივი საწვრთნელი ცენტრი. ეს ძალიან მნიშველოვანი და წინ გადადგმული ნაბიჯია. ეს არ არის არავის წინააღმდეგ მიმართული. პირიქით, ეს ცენტრი იქნება მნიშვნელოვანი იმისთვის, რომ კიდევ უფრო გაღრმავდეს რეგიონის სართაშორისო უსაფრთხოება.ეს არის ჩვენი საერთო გზა. ჩვენ ყველაფერს ვახორციელებთ წინასწარ გაწერილი გეგმის თანახმად. ჩვენ ვეხმარებით საქართველოს, რომ ის გახდეს ნატო-ს წევრი. საქართველომ უკვე ძალზედ მნიშვნელოვანი პროგრესი განიცადა. ნატო გააგრძელებს საქართველოს მხარდაჭერას. ჩვენ ძალიან ყურადღებით ვაკვირდებით თუ რა ხდება თქვენს ქვეყანაში“,-აღნიშნა იენს სტოლტენბერგმა.
ამასთან, ნატო-ს გენერალურმა მდივანმა რუსეთის მხრიდან საერთაშორისო ვალდებულების დარღვევაზე ისაუბრა.
მან აღნიშნა, რომ ალიანსის წევრები მუდმივად მხარს უჭერენ საქართველოს ტერიტორიულ მთლიანობას.
სტოლტენბერმა საქართველოს პრეზიდენტს და ქართველ ხალხს მასპინძლობისთვის მადლობა გადაუხადა.