„ევროპული საქართველო“ საგამოძიებო კომისიის რეკომენდაციების თაობაზე პარლამენტში შს მინისტრს და მთავარ პროკურორს იბარებს

2018-11-07 15:27:54, 1738 ნახვა

სამართალი

„ევროპული საქართველო" საკანონმდებლო ორგანოში დღეს რეზოლუციას შეიტანს, რომლის თანახმადაც, პარლამენტმა შსს-ს და მთავარ პროკურატურას უნდა მოსთხოვოს, გადადგას კონკრეტული ნაბიჯები იმ რეკომენდაციების შესასრულებლად, რომელიც ხორავას ქუჩაზე მომხდარი მკვლელობის საკითხის შემსწავლელმა საგამოძიებო კომისიამ ორი თვის წინ შეიმუშავა.

როგორც კომისიის ხელძღვანელმა სერგი კაპანაძემ აღნიშნა, რეზოლუციის თაობაზე პარლამენტისგან რეაგირებას უახლოეს 10 დღეში ელოდებიან.

„ეს რეკომენდაციები თქვენ იცით, რომ მრავალი მიმართულებით არის, მაგრამ რამდენიმე რეკომენდაცია მიგვაჩნია, რომ არის ფუნდამენტურად მნიშვნელოვანი, რომ მალე შესრულდეს, უახლოეს ათ დღეში. ეს არის რეკომენდაცია, რომელიც ეხება მ.კ-ს მიმართ სისხლის სამართლებრივი დევნის დაწყებას, ასევე - ეს არის რეკომენდაცია, რომელიც ეხება მირზა სუბელიანის ქმედებებზე გამოძიების დაწყებას და იმ ჩანაწერებმა, რომელიც ბოლო პერიოდში გავრცელდა, კიდევ ერთხელ დაადასტურა, რომ ჩვენს მიერ გაკეთებული დასკვნა იყო მართებული. მესამე და ყველაზე მნიშვნელოვანი არის იმ კონკრეტული ადამიანების დასჯა, მათი თანამდებობებიდან გათავისუფლება, შემდეგ კი მათ მიმართ გამოძიების დაწყება, რომლებმაც მონაწილეობა მიიღეს ამ საქმის მიჩქმალვაში და ჩაფარცხვაში. ამ სამ საკითხზე ვითხოვთ შს მინისტრი და მთავარი პროკურორი მივიდნენ პარლამენტში. მანამდე შეასრულონ რეკომენდაცია და შემდეგ უკვე მოახსენონ პარლამენტს, რას გააკეთებენ",- განაცხადა კაპანაძემ.