პუტინმა ჟურნალისტ ივან გოლუნოვის დაკავების გამო, 2 გენერალი თანამდებობიდან გაათავისუფლა

2019-06-13 15:43:46, 2951 ნახვა

მსოფლიო

რუსეთის პრეზიდენტმა ვლადიმერ პუტინმა ჟურნალისტ ივან გოლუნოვის დაკავების სკანდალის შემდეგ თანამდებობიდან ორი გენერალი გაათავისუფლა, - ამის შესახებ ინფორმაცია კრემლის ოფიციალურ ვებგვერდზე გამოქვეყნდა.

კერძოდ, თანამდებობიდან გათავისუფლდნენ: მოსკოვის აღმოსავლეთ ოლქში შინაგან საქმეთა სამმართველოს ხელმძღვანელი ანდრეი პუჩკოვი და შსს-ს მოსკოვის მთავარი სამმართველოს ნარკოტიკებთან ბრძოლის სააგენტოს ხელმძღვანელი იური დევიატკინი.

აღსანიშნავია, რომ ხსენებული პირების თანამდებობიდან გათავისუფლება პუტინს პირადად შინაგნ საქმეთა მინისტრმა ვლადიმერ კოლოკოლცევმა სთხოვა.

შეგახსენებთ, ჟურნალისტი ივან გოლუნოვი 6 ივნისს, მოსკოვში დააკავეს. ოფიციალური ვერსიით, მას ჩხრეკისას „გაურკვეველი სუბსტანციის“ შეკვრა უპოვეს, რაც გამოძიების მტკიცებით, „მეფედრონი“ (სინთეტიკური ამფეტამინი) აღმოჩნდა. ჟურნალისტს აკრძალული ნივთიერების ფლობასა და მისი გასაღების მცდელობას ედავებოდნენ.

თავად გოლუნოვმა ბრალდება უარყო და განაცხადა, რომ მანამდე ეს შეკვრა არასდროს უნახავს.

პორტალ „მედუზას“ გამომძიებელი ჟურნალისტის წინააღმდეგ სისხლისსამართლებრივი დევნა 11 ივნისს შეწყდა.

Patreon P მხარი დაუჭირე "ექსპრესნიუსს" →

ავტორი: ლუკა ცარციძე, ექსპრესნიუსის რეპორტიორი 2019 წლიდან