თვალაბეიშვილი: 6-8 წლიან პერიოდში ენერგოეფექტიანობის განხორციელებას საქართველოში პირველადი ენერგომოხმარების დაახლოებით 14 პროცენტით შემცირება შეუძლია

2019-12-18 10:15:57, 1401 ნახვა

ეკონომიკა

ეკონომიკისა და მდგრადი განვითარების მინისტრის მოადგილე დავით თვალაბეიშვილმა მონაწილეობა მიიღო ენერგოეფექტურობისა და შენობების ენერგოეფექტიანობის შესახებ კანონპროექტების საჯარო განხილვაში, რომელიც საქართველოს პარლამენტში დარგობრივი ეკონომიკისა და ეკონომიკური პოლიტიკის საპარლამენტო კომიტეტის, ეკონომიკისა და მდგრადი განვითარების სამინისტროსა და ბიზნესისა და ეკონომიკის ცენტრის (BEC) ორგანიზებით გაიმართა. განხილვას ბიზნესის, აკადემიური წრეების, დონორი ორგანიზაციებისა და არასამთავრობო ორგანიზაციების წარმომადგენლები დაესწრნენ.

საჯარო განხილვაზე სიტყვით გამოსვლისას, მინისტრის მოადგილემ სტრატეგიულად მნიშვნელოვანი უწოდა ენერგოეფექტიანობის შესახებ კანონების მიღებას და აღნიშნა, რომ ენერგოეფექტიანობის განხორციელება 6-8 წლიან პერიოდში საქართველოს შესაძლებლობას მისცემს, რომ პირველადი ენერგომოხმარება დაახლოებით 14 პროცენტით შეამციროს.

„შეფასებები აჩვენებს, რომ მთლიანად ენერგიის იმპორტის ზრდის დაფინანსების ნაცვლად ქვეყანაში ენერგოეფექტიან ღონისძიებებში ინვესტირების შედეგად დაზოგილი ყოველი მილიონი კილოვატ-საათი ენერგია, ენერგიის სხვადასხვა სახეობის მიხედვით, 20,000 ევროდან 50,000 ევრომდე თანხის დაზოგვას გამოიწვევს," - აღნიშნა მინისტრის მოადგილემ.

დავით თვალაბეიშვილის განცხადებით, ენერგოეფექტიანობის ერთ-ერთი ყველაზე პერსპექტიული მიმართულება შენობების ენერგომოხმარების შემცირებაა. მისი თქმით, სხვადასხვა დონორი ორგანიზაციების მიერ განხორციელებულმა კვლევამ აჩვენა, რომ საქართველოში საშუალო კუთრი წლიური ენერგიის მოხმარება შენობებში საკმაოდ მაღალია - საცხოვრებელი შენობებში მისი მაჩვენებელია 250 კვტ.სთ/კვადრატულ მეტრზე მეტი, რაც სხვა შესადარებელი ქვეყნების ანალოგიურ მაჩვენებელს მნიშვნელოვნად აღემატება.

მინისტრის მოადგილის ინფორმაციით, ენერგოეფექტურობის შესახებ კანონპროექტის მიზანს ქვეყნის მასშტაბით ენერგოეფექტიანობის ზრდისა და შესაბამისად, ეკონომიკურად და ეკოლოგიურად გამართლებული გზებით ენერგიის დაზოგვის ხელშეწყობა წარმოადგენს. მისი თქმით, განისაზღვრება ენერგოეფექტიანობის ეროვნული სამიზნე მაჩვენებელი, რომლის მისაღწევადაც შემუშავდება ენერგოეფექტიანობის სამოქმედო გეგმა და მიღების პროცედურები.

საქართველოს პარლამენტი პირველი მოსმენით კანონპროექტებს უახლოეს სხდომებზე განიხილავს.

Patreon P მხარი დაუჭირე "ექსპრესნიუსს" →

ავტორი: NS (სტატია დაფინანსებულია),