საქართველოს პარლამენტის თავმჯდომარის პირველი მოადგილე თამარ ჩუგოშვილი აცხადებს, რომ შს მინისტრის გიორგი გახარიას ვრცელ ინტერვიუს დამატებითი შეფასებები არ სჭირდება.

ჟურნალისტების კითხვაზე, იმყოფებოდა თუ არა გიორგი გახარია აქციის ღამეს ელჩებთან ერთად, ჩუგოშვილი აღნიშნავს, რომ ამის შესახებ ინფორმაცია არ აქვს.

ამასთან, ჟურნალისტები დაინტერესდნენ, რომ იყო თუ თუ არა იმ ღამეს კომუნიკაცია ბიძინა ივანიშვილთან.

„მე რატომ უნდა გიპასუხოთ ამ კითხვაზე, არაფერ შუაში არ ვარ, ვის ვისთან ჰქონდა კომუნიკაცია, ამის შესახებ არაფერი ვიცი და არც უნდა ვიცოდე“, – განუცხადა ჩუგოშვილმა ჟურნალისტებს.

„რუსთავი 2“-ის ჟურნალისტის შეკითხვაზე, გუშინდელი ინტერვიუდან გამომდინარე, უნდა დადგეს თუ არა გახარიას სისხლის სამართლის პასუხისმგებლობის საკითხი, ჩუგოშვილმა აღნიშნა: „თქვენ ალბათ ხუმრობით მეკითხებით ხომ?“. ამავე ტელეკომპანიის კითხვაზე, დაინახა თუ არა ამ ინტერვიუს შემდეგ გახარიას პოლიტიკური პასუხისმგებლობის საფუძველი, ჩუგოშვილმა განაცხადა:

„თქვენი შეფასება ჩემთვის არის წმინდა პარტიული შეფასება, პირდაპირ გეუბნებით, რომ თქვენი პოზიცია და თქვენი აღქმა მოვლენების პირდაპირ არის წმინდა პარტიული ხაზით შეფასება მოვლენების და მე ვერ გამოგყვებით ამ შეფასებაში. ჩემი პოზიციის მოსმენის საშუალება აქვს საზოგადოებას, როცა ეს სჭირდება, ამ ფორმატში არ ვაპირებ თქვენს კითხვაზე პასუხს, გასაგები მიზეზების გამო, თუ გინდათ, დავჯდეთ ეთერში და ვისაუბროთ“.

ამასთან, ჟურნალისტებთან საუბრისას თამარ ჩუგოშვილი გამოეხმაურა ოპოზიციის წარმომადგენლების გამოკითხვაზე დაბარებასაც.

„ნებისმიერი ცივილიზებული, განვითარებული ქვეყნის წარმომადგენლისთვის იმის ნახვა არის სრულიად შოკისმომგვრელი, რომ პოლიტიკოსები პარლამენტის შტურმისკენ მოუწოდებდნენ ადამიანებს. ძალიან ბევრ ადამიანთან მქონდა ახლა შეხვედრა, უცხოელებთან და აბსოლუტურად ყველა ფიქრობს, უფრო სწორად, ცოტა შოკშიც კი არის, როდესაც ხედავენ და თავიანთი თვალით ნახეს კადრები და ინფორმაცია, როდესაც, პოლიტიკოსები პარლამენტის შტურმისკენ მოუწოდებდნენ ადამიანებს. ეს არის ნებისმიერი ცივილიზებული განვითარებული ქვეყნის წარმომადგენლისთვის ამის ნახვა არის სრულიად შოკისმომგვრელი.

ასე რომ, მსგავს საკითხებს რომ სამართლებრივი და პოლიტიკური რეაგირება მოყვება, ეს ნურავის უკვირს. ნებისმიერ ცივილიზებულ საზოგადოებაში პარლამენტის წევრი და პოლიტიკოსი პარლამენტზე შტურმისკენ ვინმეს მოუწოდებდეს და მიუძღოდეს ეს არის წარმოუდგენელი რამ და ჩვენ უნდა მივეჩვიოთ, თუ მოხდება ასეთი მოვლენები, იმაზე შესაბამისი სამართლებრივი რეაგირებაც იქნება და ამას პოლიტიკურ დევნას კი ნუ ეძახიან, პოლიტიკური და სამართლებრივი პასუხისმგებლობა არის ეს“, – განაცხადა თამარ ჩუგოშვილმა.

(NS)

ავტორი: ექსპრესნიუსი,

სოციალური ქსელები

თავს დაესხნენ უცხო ქვეყნის მოქალაქეებს, სცემეს და ტელეფონები გასტაცეს- დაკავებულია 4 არასრულწლოვანი

ტრამპმა საფონდო ბირჟის მკვეთრ ვარდნაში დემოკრატები დაადანაშაულა

საგარეჯოში, ძმების დამამძიმებელ გარემოებაში ჩადენილი განზრახ მკვლელობის ფაქტზე ერთი პირი დააკავეს

Bloomberg: ფონ დერ ლაიენმა პოლონეთის პრეზიდენტთან პრესკონფერენციაზე უარი თქვა, ამით მხარი ტუსკს დაუჭირა