13-14 ივნისს მომხდარი სტიქიის შედეგად მდინარე ვერეს ხეობის და მისი მიმდებარე ტერიტორიის მდგომარეობის შესწავლისა და შემდგომი აღდგენითი სამუშაოების ორგანიზების მიზნით, უწყებათაშორისი კომისია იქმნება, - ამის შესახეხბ საქართველოს პრემიერ-მინისტრმა ირაკლი ღარიბაშვილმა საგანგებო შტაბის სხდომაზე განაცხადა.

კომისიის მუშაობაში ჩაერთვებიან მსოფლიოში ცნობილი უცხოელი და ქართველი სპეციალისტები - გეოლოგები, არქიტექტორ-ურბანისტები, გეოკონსტრუქტორები და სხვა სპეციალისტები, რათა თითოეულ დეტალზე მაღალკვალიფიციური და კომპეტენტური დასკვნა მომზადდეს.

„სტიქიის შედეგების დროული და ეფექტური აღმოფხვრის პარალელურად, ჩვენ უნდა ვიფიქროთ და ვიმუშაოთ მისი გამომწვევი მიზეზების შესწავლაზე. ჩვენ ერთხელ და სამუდამოდ უნდა დავადგინოთ, როგორ უნდა დაგეგმარდეს ვერეს ხეობა. ნახევარ საუკუნეზე მეტია, სხვადასხვა ხელისუფლება აკვირდება, თუმცა ამ პრობლემის აღმოსაფხვრელად ადეკვატურად არ რეაგირებს. ვერე საკმაოდ რთული მდინარეა. სამწუხაროდ, ბოლო მთავრობებმა პირდაპირ ბრძოლა გამოუცხადეს ბუნებას, რაც ძალიან დიდი შეცდომაა. ამის ნათელი დადასტურება იყო ყოფილი პრეზიდენტის, სააკაშვილის და მისი გუნდის გაუგებარი ახირება, რამაც მნიშვნელოვანწილად განაპირობა ის, რაც მოხდა, თუმცა საბოლოო დასკვნას დაველოდებით. ის, რაც მოხდა ვერეს ხეობაში, არის კატასტროფა და ჩვენ დღეს ყველაფერი უნდა გავაკეთოთ სწორად, რომ შეცდომები აღარ გავიმეოროთ“, - განაცხადა პრემიერმა.

მთავრობის მეთაურის თქმით, ყველაფრის გამორიცხვა შეუძლებელია, ხელისუფლების ამოცანაა, ყველა შესაძლო რისკი მინიმუმამდე შემცირდეს.

უწყებათაშორის კომისიას პრემიერ-მინისტრი უხელმძღვანელებს, თანათავმჯდომარე იქნება თბილისის მერი, ხოლო კომისიის წევრები - ეკონომიკის, ენერგეტიკის, ფინანსთა, შინაგან საქმეთა, გარემოს დაცვის, რეგიონული განვითარებისა და ინფრასტრუქტურის მინისტრები, ასევე სახელმწიფო უსაფრთხოებისა და კრიზისების მართვის საბჭოს მდივანი და თბილისის ვიცე-მერი.

კომისიამ, საჭიროების შემთხვევაში, უნდა განახორციელოს სტიქიურ ზონაში მოხვედრილ ადამიანთა სიცოცხლის დაცვის შესაბამისი ღონისძიებების დაგეგმვა და შემდგომში იმპლემენტაციის კოორდინაცია; უნდა შეიმუშაოს ერთიანი პოლიტიკა სტიქიის შედეგად დაზიანებული საგზაო და სხვა საინჟინრო ინფრასტრუქტურის აღდგენითი სამუშაოების პროექტირების  და შედგომში მშენებლობის მიზნით; ასევე, უნდა უზრუნველყოს სტიქიის შედეგად მიყენებული ზარალის ანაზღაურების ღონისძიებების დაგეგმვა და კოორდინაცია.

დადგენილება, უწყებათაშორისი კომისიის შექმნის შესახებ, მთავრობის უახლოეს სხდომაზე დამტკიცდება.

ავტორი: ირაკლი მანაგაძე , ექსპრესნიუსის რეპორტიორი 2009 წლიდან

სოციალური ქსელები

იანვარში მომიტინგეების სიკვდილით დასჯის გამო ირანში ახალი საპროტესტო აქციები გაიმართა

10-დღიანი პატიმრობა შეუფარდეს დემონსტრანტს, რომელიც საკრებულოსთან დააკავეს

ზელენსკიმ ტრამპთან Patriot-ის რაკეტების წარმოება და დიპლომატიის დაჩქარება განიხილა

ჯო უილსონი - “ქართული ოცნება” სიტყვის თავისუფლებას “სიძულვილის ენის” შეჩერების საბაბით ანადგურებს, ამ პრორუსულ, პროირანულ, პროჩინურ რეჟიმს ამერიკა ეზიზღება