მახარობლიშვილი: საქართველოსთან უვიზო რეჟიმის შეჩერება ევროკავშირის დღის წესრიგში არ დგას

2018-04-30 17:17:21, 1881 ნახვა

პოლიტიკა

საგარეო საქმეთა მინისტრის მოადგილის ვახტანგ მახარობლიშვილის განცხადებით, საქართველოსთან უვიზო რეჟიმის შეჩერება ევროკავშირის დღის წესრიგში არ დგას.

როგორც მახარობლიშვილმა აღნიშნა, საქართველო ევროკავშირთან და მის წევრ ქვეყნებთან მუდმივ კონტაქტზეა, რათა არსებული პრობლემები გადაიჭრას.

"მინდა ხაზგასმით აღვნიშნო, რომ მიმდინარე ეტაპზე საქართველოსთან უვიზო რეჟიმის შეჩერება ევროკავშირის დღის წესრიგში არ დგას. ქართული მარე ძალიან აქტიურად თანამშრომლობს როგორც ევროკავშირთან და მის შესაბამის სააგენტოებთან, ასევე ევროკავშირის წევრ ქვეყნებთან. მოგეხსენებათ, რომ რომ უვიზო რეჟიმის ძალაში შესვლის დღიდან საქართველოში შესაბამისი უწყებები ძალიან მჭიდროდ აკვირდებოდნენ და მონიტორინგს უკეთებდნენ მიმდინარე პროცესებს და ასრულებდნენ იმ ვალდებულებებს, რომელიც ჩვენ აღებული გვქონდა შესაბამისი სამოქმედო გეგმის მიხედვით. თუმცა მას შემდეგ რაც გამოიკვეთა კონკრეტული პრობლემატიკა თავშესაფრის უსაფუძვლოდ მოთხოვნებთან დაკავშირებით, განსაკუთრებული ყურადღება დაეთმო ამ პრობლემატიკის გადაჭრას. ამ კუთხით სხვადასხვა საქმიანობა მიმდინარეობს. კერძოდ, მიმდინარეობს აქტიური საინფორმაციო კამპანია შესაბამისი უწყებების მხრიდან, ასევე საკანონმდებლო ცვლილებების კუთხით განხილვები, კონკრეტული საკანონმდებლო ცვლილება უკვე განხორციელდა. კიდევ უფრო გააქტიურდა თანამშრომლობა ევროკავშირთან და მის წევრ ქვეყნებთან. შედგა არა ერთი მნიშვნელოვანი შეხვედრა როგორც საქართველოში ასევე გერმანიაში", - განაცხადა მინისტრის მოადგილემ და მოსახლეობას კიდევ ერთხელ მოუწოდა, ევროკავშირში ვიზიტის დროს იქ ყოფნის წესები არ დაარღვიონ.

"მინდა საქართველოს მოქალაქეებს მივმართო, რომ ამ მონაპოვარს გაუფრთხილდნენ, რომელიც ჩვენს ქვეყანას გააჩნია და ასევე არ დაარღვიონ შენგენის ზონაში ყოფნის წესები", - დასძინა მახარობლიშვილმა.

Patreon P მხარი დაუჭირე "ექსპრესნიუსს" →

ავტორი: ,

სოციალური ქსელები